پرینکا گاندھی واڈرا نے کہا کہ لاک ڈاؤن کے سبب مصائب و آلام برداشت کرتے ہوئے شدید گرمی میں پیدل چلنے والے مزدوروں کو گھر بھیجنے کی ذمہ داری ہم سب کی ہے لہٰذا اترپردیش حکومت کو نوئیڈا اور غازی آباد بارڈر پر کھڑی ہوئی بسوں سے مہاجر مزدوروں کو لے جانے کی فوراً اجازت دینی چاہیے۔
انہوں نے کہا کہ 'ان کی پارٹی کے کارکنان نے ڈیڑھ ہزار سے زائد بسوں کا انتظام ان مزدوروں کو گھروں تک پہنچانے کے لیے کیا ہے اور تمام بسیں غازی آباد اور نوئیڈا بارڈر پر کھڑی ہیں، مزدوروں کے مفاد میں اترپردیش حکومت کو ان بسوں کے چلائے جانے کی اجازت دینی چاہیے۔
پرینکا نےکہا کہ 'ریاست کے وزیراعلیٰ یوگی آدتیہ ناتھ سے اجازت ملنے کے بعد 17 مئی کو 500 بسیں اور 19 مئی کو 900 بسیں نوئیڈا، غازی آباد میں کھڑی ہیں لیکن حکومت ان بسوں کو مزدوروں کو لے کر جانے کی اجازت نہیں دے رہی ہے۔
انہوں نے کہا کہ اس مسئلے پر سیاست نہیں ہونی چاہیے اور بسوں کو چلنے دیا جانا چاہیے، ان کا کہنا تھا کہ اگر اجازت مل گئی ہوتی تو اب تک 90 ہزار سے زائد افراد اپنے گھروں کو پہنچ گئے ہوتے۔
پرینکا گاندھی کے مطابق کانگریس اب تک 67 لاکھ مہاجر مزدوروں کو ان کے گھروں تک پہنچا چکی ہے جن میں سے 60 لاکھ محض اترپردیش کے ہیں۔
