کانگریس پارٹی کے قومی ترجمان پی ایل پنیا نے مایاوتی کو بی جے پی کی بی ٹیم قرار دیا ہے. انہوں نے کہا کہ مایاوتی بی جے پی کے ساتھ کھڑے رہنے کے لیے موقع کی تلاش میں رہتی ہیں۔ انہوں مرکزی حکومت پر مزدوروں سے کرایہ کے نام پر زیادہ قیمت وصول کرنے کا بھی الزام لگایا۔
لاک ڈاون کے دوران پہلی مرتبہ بارہ بنکی میں واقع اپنی رہائش گاہ پہنچے کانگریس رکن پارلیمان اور قومی ترجمان پی ایل پنیا نے ای ٹی وی بھارت کو بتایا کہ مایاوتی موقع کی تلاش میں رہتی ہیں کہ وہ کس طرح بی جے پی کے ساتھ کھڑی ہو سکیں اور کانگریس پر نکتہ چینی کریں۔
انہوں نے مزید کہا کہ مایاوتی مزدوروں کی بات کرتی ہیں لیکن ان کی پارٹی کا کوئی بھی کارکن کسی مزدور کی مدد کرتے ہوئے نہیں دکھائی دیا۔ انہوں نے کہا کہ صرف ٹوئٹر پر بیان بازی سے کچھ نہیں ہوتا.
وہیں پی ایل پنیا نے مرکزی حکومت پر الزام لگایا کہ وہ مزدوروں کو گھر بھیجنے کے لیے چلائی گئیں ٹرینوں کے نام پر تجارت کررہی ہے.
