نئی دہلی: سیاست میں دلچسپی رکھنے والے دہلی کے نوجوانوں کے لیے سنہری موقع ہے۔ عام آدمی پارٹی کے سینئر لیڈر منیش سسودیا نے اعلان کیا ہے کہ وہ آئندہ اسمبلی انتخابات کے دوران جنگ پورہ سیٹ سے اپنی انتخابی مہم کے حصہ کے طور پر نوجوانوں کو انتخابی مہم سے متعلق انٹرن شپ کا موقع فراہم کریں گے۔ دہلی کے سابق نائب وزیر اعلیٰ منیش سسودیا نوجوان طلباء کے ساتھ اپنا سیاسی تجربہ بانٹنا چاہتے ہیں۔ انہوں نے ایکس پلیٹ فارم پر ویڈیو شیئر کرکے اس کے بارے میں بتایا۔
منیش سسودیا نے اس انٹرن شپ پروگرام کے حوالے سے ویڈیو میں نوجوان طلبا سے کہا کہ ’اگر آپ جاننا چاہتے ہیں کہ لیڈر کیسے سوچتے ہیں، انتخابی مہم کیسے چلائی جاتی ہے اور عوامی مسائل کو کیسے سمجھا جاتا ہے، تو آپ میری ٹیم میں شامل ہوسکتے ہیں۔ وہ چاہتے ہیں کہ دہلی کے نوجوان ان کے ساتھ آئیں اور انتخابی عمل کو قریب سے سمجھیں۔ سسودیا نے مزید کہاکہ "اگر آپ کالج میں پڑھ رہے ہیں اور انتخابی مہم سے متعلق میری کلاس میں شامل ہونا چاہتے ہیں تو 'منیش سسودیا کے ساتھ انٹرنشپ' پر رجسٹر ہوں۔" یہ اقدام نوجوانوں کو نہ صرف سیاست کی نظریاتی سمجھ فراہم کرے گا بلکہ انہیں انتخابی حکمت عملی، عوام سے رابطے اور ٹیم ورک کا حقیقی تجربہ بھی فراہم کرے گا۔
منیش سسودیا نے نوجوانوں پر زور دیا کہ وہ انتخابی سرگرمیوں میں حصہ لے کر مختلف خیالات اور نقطہ نظر کو سمجھیں اور یہ بھی جانیں کہ ایک لیڈر اپنی ٹیم کو کس طرح تربیت دیتا ہے اور سماجی مسائل کو حل کرنے کے لیے کیا اقدامات کرتا ہے۔ یہ موقع ان تمام کالج کے طلباء کے لیے ہے جو سیاست میں اپنی دلچسپی کو گہرا کرنا چاہتے ہیں۔ یہ انٹرن شپ نوجوان امیدواروں کے لیے سیاست کے میدان میں قدم رکھنے کا بہترین موقع ثابت ہوسکتا ہے جس سے ان کے لیے مستقبل میں سیاسی عمل اور انتخابی مہم میں حصہ لینے کی راہ ہموار ہو گی۔
