اترپردیش کے ضلع نوئیڈا کے سیکٹر 50 میں واقع جے جے کالونی میں پائپ لائن میں رساؤ ہونے کی وجہ سے یہاں کے کچے مکانات، جھوپڑیوں اور جھگیوں کی حالت انتہائی خستہ ہو چکی ہے۔ پانی کے پائپ لائن میں ہو رہے رساؤ کے خلاف صفائی غریب مزدور اتھان یونین نے کالونی کے باہر مظاہرہ کیا اور ضلع انتظامیہ کے خلاف نعرے بازی کی۔
واضح رہے کہ اسی کچی آبادی کے زیر زمین نوئیڈا اٹھارٹی کی واٹر سپلائی پائپ لائن بھی جا رہی ہے جو اندر سے متعدد جگہوں پر بلاک ہے جس سے پانی رستا رہتا ہے۔
پانی رسنے کے سبب یہاں کے تعمیر کچے مکانات کی در و ریوار مسلسل کمزور ہوتی جا رہی ہیں۔ بعض مکانات کی دیواروں میں شگاف بھی پڑنے لگے ہیں۔ اس سلسلے میں 37 اور 39 محکمہ واٹر سپلائی کے دفتر میں شکایت بھی درج کرائی گئی لیکن مسئلے کا کوئی حل نہیں نکالا گیا۔ جواب میں یہ کہا گیا کہ علاقہ کو چھوڑ کر چلے جائیں کیونکہ یہاں پر مزید کچے مکانات کے منہدم ہونے کے آثار ہیں۔
وہیں، انتظامیہ نے خستہ حال مکانات کی نشاندہی کرتے ہوئے انہیں سیل کر دیا ہے اور لوگوں کو علاقہ چھوڑنے کی وارننگ دی ہے۔ انتظامیہ کی عدم توجہی کے خلاف کالونی کے لوگ دھرنے پر بیٹھ گئے ہیں اور انتظامیہ کے خلاف نعرے بازی کر رہے ہیں۔
