اترپردیش میں آئندہ 2022 میں ہونے والے اسمبلی انتخابات کے پیش نظر ریاست میں سیاسی سرگرمیاں عروج پر ہیں۔ اس دوران سماجوادی پارٹی، بی ایس پی اور بی جے پی کے برعکس عوام کو ایک الگ متبادل دینے کے لیے تمام پارٹیاں کوشاں ہیں۔
اس سلسلے میں پیس پارٹی ریاست میں مکمل سواراج یاترا نکال کر عوام کو اپنی جانب متوجہ کرنے کی مسلسل کوشش میں لگی ہے، پیس پارٹی اقلیتوں اور کمزور طبقات کے مسائل کو حل کرنے کا دعویٰ کر رہی ہے۔ پیس پارٹی کی کوشش ہے کہ اسے کم از کم 40 نشستوں پر کامیابی ملے تاکہ وہ آئندہ ریاست میں بننے والی حکومت میں کنگ میکر کا رول ادا کرسکے۔
پیس پارٹی کی یہ مکمل سواراج یاترا جمعرات کو بارہ بنکی پہونچی۔ یاترا کی قیادت ریاستی انچارج اور پارٹی صدر ڈاکٹر ایوب کے بیٹے انجینئر محمد عرفان کر رہے تھے۔
اس یاترا کا ضلع بھر میں جوش و خروش کے ساتھ استقبال کیا گیا، آخر میں یہ یاترا بارہ بنکی کے لکھپیڑا باغ واقع ایک میرج حال میں مکمل ہوئی، یہاں ایک تقریب کے بعد صحافیوں سے گفتگو کرتے ہوئے انجینئر محمد عرفان نے کہا کہ اس یاترا کے ذریعہ وہ عوام کو گزشتہ حکومتوں کی ناکامی کے تئیں بیدار کر رہے ہیں، تاکہ ہم ایک سیاسی متبادل عوام کو دے سکیں۔
مزید پڑھیں:
انہوں نے کہا کہ وہ 300 نشستوں پر امیدوار کھڑے کریں گے، پیس پارٹی کی کوشش ہے کہ وہ زیادہ سے زیدہ سیٹوں پر جیت حاصل کرے تاکہ وہ حکومت تشکیل کرسکے۔
