اتر پردیش کے گوتم بدھ نگر کے گریٹر نوئیڈا نالج پارک پولیس اسٹیشن کے تحت گل گوٹیا انجینئرنگ کالج میں قائم کئے گئے قرنطینہ سنٹر کی ساتویں منزل سے چھلانگ لگا کر محمد گلزار نامی نوجوان نے خودکشی کرلی۔
شدید طور پر زخمی گلزار کو فوری طور پر اسپتال لے جایا گیا جہاں ڈاکٹروں نے اسے مردہ قرار دے دیا۔ گزشتہ شب اطلاع ملتے ہی پولیس ، انتظامیہ اور محکمہ صحت کے اہلکار موقع پر پہنچ گئے۔
بتایا جاتا ہے کہ فیس 2 نوئیڈا کے رہنے والے 32سالہ گلزار نے پہلے بھی خودکشی کی دھمکی دی تھی جس کے بعد اس کی کاونسلنگ بھی کی گئی تھی۔
واضح رہے کہ ضلع انتظامیہ نے شہر میں مختلف مقامات پر قرنطینہ سینٹر قائم کئے ہیں۔ انتظامیہ نے کالج ہاسٹل کو بھی اپنے قبضے میں لے لیا تھا۔
کورونا وائرس سے انفیکیٹیڈ مشتبہ افراد کو اس ہاسٹل میں رکھا گیا ہے۔ گلزار کا نمونہ بھی تفتیش کے لئے بھیجا گیا تھا۔
ذرائع کے مطابق ابھی تک یہ رپورٹ موصول نہیں ہوئی۔ اتوار کی شام مشتبہ شخص کافی پریشان تھا۔جس کے بعد اس نے یہ قدم اٹھایا۔
دریں اثنا ، ڈسٹرکٹ مجسٹریٹ سہاس ایل وائے نے بتایا کہ واقعے کی مجسٹریٹ انکوائری کا حکم دیا گیا ہے۔
تحقیقات کی ذمہ داری اے ڈی ایم انتظامیہ کو سونپی گئی ہے۔
