ریاست اترپردیش کے شہر رامپور کی جامع مسجد میں آج انلاک 5 کے دوسرے جمعہ میں نماز جمعہ کے موقع پر صرف پانچ ہی مصلین نے نماز جمعہ ادا کی۔
انلاک۔5 کی گائیڈلائن کے مطابق اب سب کچھ لاک ڈاؤن سے پہلے کی طرح کھلتا دکھائی دے رہا ہے۔ تمام سرگرمیاں عام دنوں کی طرح نظر آنے لگی ہیں۔ لیکن مساجد میں ابھی بھی لاک ڈاؤن جیسی ہی صورتحال نظر آرہی ہے۔ یہ ہے رامپور کی جامع مسجد جہاں آج انلاک 5 کے دوسرے جمعہ کو نماز جمعہ کے موقع پر امام صاحب کے علاوہ صرف پانچ ہی مصلین کو نماز ادا کرتے دیکھا جا سکتا ہے۔
رامپور جامع مسجد کے نائب امام مولانا حسیب احمد کی امامت میں نماز جمعہ کا اہتمام کیا گیا۔ اس موقع پر جب ہم نے مولانا حسیب احمد سے سوال کیا کہ جس طرح سے انلاک۔5 میں دیگر سرگرمیوں میں رعایت نظر آرہی ہے، کیا عبادات کی ادائیگی کے لیے انتظامیہ کی جانب سے ابھی کوئی رعایت نہیں دی گئی؟
اس سوال کے جواب میں انہوں نے کہا کہ عبادات کے تعلق سے انلاک۔5 کی گائیڈلائن میں کوئی رعایت نہیں دی گئی ہے جبکہ جامع مسجد انتظامیہ کے اراکین ڈی ایم آنجنئے کمار سنگھ سے ملاقات کر چکے ہیں اور تحریر بھی دے چکے ہیں کہ جہاں دیگر تقریبات میں 100 افراد تک شامل ہونے کی اجازت ہے تو نماز کے لیے بھی اجازت دی جائے۔ لیکن ابھی تک ضلع انتظامیہ کی جانب سے اس سلسلے میں کوئی معقول جواب موصول نہیں ہو سکا ہے۔
بہرحال اترپریش میں تمام سرگرمیاں پہلے کی طرح انجام دی جانے لگی ہیں۔ اب دیکھنا یہ ہوگا کہ کب اور کیسے مساجد کے دروازوں کو کھولنے کی اجازت ضلع انتظامیہ کو اوپر سے ملے گی اور پھر ضلع انتظامیہ کب مساجد کے ذمہ داران کو اس کی اجازت دیتے ہیں۔
