لکھنؤ پولیس نے آج منور رانا کی بیٹی اور کانگریس کی رہنما عروسہ رانا کو حراست میں لیا ہے۔
اترپردیش کانگریس کمیٹی کے ریاستی صدر اجے کمار للو نے خواتین کے ساتھ ہونے والی زیادتی کے خلاف لکھنؤ کے پریورتن چوک سے اسمبلی ہاؤس تک پیدل مارچ نکال کر احتجاج شروع کیا تھا لیکن اس سے پہلے ہی پولیس پوری طرح سے مستعد تھی تاکہ کسی بھی طرح کی ہنگامہ آرائی نہ ہونے پائے۔
اسی کے مد نظر کانگریس کے کارکنان کے ساتھ بڑے رہنماؤں کو بھی پولیس حراست میں لے رہی ہے۔ اس سلسلے میں منور رانا کی بیٹی عروسہ رانا کو بھی پولیس نے حراست میں لے لیا ہے۔
واضح رہے کہ عروسہ رانا گزشتہ 21 اکتوبر کو کانگریس پارٹی میں شامل ہوئی ہیں اور انہیں یوپی کانگریس خواتین کمیٹی کے نائب صدر کی ذمہ داری دی گئی ہے۔ اس کے بعد سے ہی وہ خواتین کے حقوق کے لئے یوگی حکومت پر نکتہ چینی کر رہی ہیں۔
قابل ذکر ہے کہ کانگریس پارٹی یوگی حکومت کو ہر محاذ پر ناکام مان رہی ہے۔ ریاست میں لگاتار چھوٹی بچیوں سے لے کر خواتین تک محفوظ نہیں ہیں۔ ان کے خلاف جنسی جرائم کے معاملے میں اضافہ ہوتا جا رہا ہے لیکن حکومت کوئی کارروائی نہیں کر رہی ہے۔
