مغل سرائے ریلوے ڈویژن کا نام بھی تبدیل

ضلع چندولی میں واقع مغل سرائے ریلوے ڈویژن کا نام بھی تبدیل کر دیا گیا ہے اس سے قبل مغل سرائے جنکشن کا نام بھی تبدیل کیا گیا تھا۔

ریاست اترپردیش کے ضلع چندولی مغل سرائے ریلوے ڈویژن کا نام تبدیل کردیا گیا ہے ریلوے نے نام کی تبدیلی کا نوٹیفکیشن جاری کیا ہے۔ اب مغلسرائے ریلوے ڈویژن کا نام پنڈت دین دیال اپادھیائے ریلوے ڈویژن ہو گیا ہے۔

مغلسرائے ریلوے ڈویژن کا نام اب پنڈت دین دیال اپادھیائے ریلوے ڈویژن رکھا جائے گا۔ مرکزی وزیر اور چندولی کے رکن پارلیمان ڈاکٹر مہندر ناتھ پانڈے کے اقدام پر ریلوے ڈویژن کا نام تبدیل کیا گیا۔

گزشتہ دنوں صحافیوں سے گفتگو کے دوران مرکزی وزیر نے کہا تھا کہ 'اس کا نام تبدیل کیا جانا چاہئے۔ انہوں نے کہا کہ مغلسرائے نام کی کوئی چیز نہیں ہے، لہذا ڈویژن کا نام بھی تبدیل کیا جانا چاہئے۔ مغلسرائے ڈویژن کو اب دین دیال ڈیویژن کہا جائے گا۔

واضح رہے کہ سنہ 1968 میں مغلسرائے جنکشن کے اپ یارڈ میں پنڈت دین دیال اپادھیائے کی لاش ملی تھی۔ جس کو لے کر بی جے پی کارکنان اور سنگھ سے وابستہ افراد یہ مطالبہ کرتے رہے کہ ان کے مجسمہ کے ساتھ ساتھ اس جنکشن کا نام بھی تبدیل کیا جائے۔