ریاست اتر پردیش کے ضلع مرادآباد کے آزاد نگر میں واقع امام باڑہ میں ہر سال کی طرح اس سال بھی نواسۂ رسول حضرت امام حسنؓ کی یاد میں جلوس نکالا گیا۔
جلوس سے قبل مولانا سید فیضان رضا نقوی نے مجلس کو خطاب کرتے ہوئے حضرت امام حسنؓ کے مصائب پڑھے اور انھوں نے اپنی تقریر میں بتایا کہ اسلامی مہینہ صفر کی 28 تاریخ کو نواسۂ رسول حضرت امام حسنؓ کی شہادت ہوئی تھی۔
مولانا نے بتایا کہ امام حسنؓ کو یزید نے زہر دے کر شہید کرایا تھا اسی سلسلہ میں پورے ملک میں 28 صفر کو امام حسنؓ کی یاد میں مجلس ماتم اور جلوسوں کا سلسلہ جاری رہتا ہے۔
مولانا نے مجلس کو خطاب کرتے ہوئے بتایا حضرت امام حسنؓ حضرت امام حسینؓ کے بڑے بھائی تھے اور حضرت محمدؐ کے نواسے تھے، جنہوں نے دین اسلام اور انسانیت کو بچانے کے لیے اپنی شہادت دی۔
مولانا سید فیضان رضا نقوی نے تاریخ کا حوالہ دیتے ہوئے یہ بھی بتایا کہ جہاں ایک طرف 28 صفر کو امام حسنؓ کی شہادت ہوئی ہے تو وہیں اھل تشیع کے مطابق حضرت محمدؐ بھی صفر کی 28 تاریخ کو ہی اس دنیا سے پردہ کرگئے تھے۔
