مرادآباد کے سماج وادی پارٹی سے رکن پارلیمان ڈاکٹر ایس ٹی حسن نے آج میڈیا سے بات چیت کرتے ہوئے کہا کہ کورونا ویکسین کو لگوانے کے لیے بہت زیادہ پاگل نہ ہوں۔ کورونا کی جو نئی ویکسین ہے اسکے سائڈ ایفیکٹ کے بارے میں زیادہ معلوم نہیں ہے اور جب بھی یہ ویکسین لگائیں تب اسکے پورے پروٹوکول کو فولو کیا جائے۔ ویکسین لگانے والے شخص کا درجہ حرارت اور بلڈ پریشر چیک کیا جائے۔
رکن پارلیمان نے یہ بات مرادآباد کے ضلع اسپتال میں وارڈ بوائے کے عہدے پر تعینات مہیپال سنگھ کی موت کی خبر پر کہی ہے۔انہوں نے مرکزی حکومت سے مطالبہ کرتے ہوئے کہا کورونا ویکسین لگوانے کے لیے عجلت نہ کریں، کیونکہ ابھی تک اس ویکسین کے بارے میں تمام جانکاری دستیاب نہیں ہوپائی ہے۔یہ بہت اچھی بات ہے کہ بھارت اس جانب ترقی کر رہا ہے اور ہماری ایک ویکسین کامیاب بھی ہے۔
انہوں نے مزید کہا کہ ویکسین لگوانے میں جلد بازی نہ کی جائے، جب تک اس کے پورے ٹیسٹ نہ ہو جائے۔ کیونکہ ایک ویکسین ایسی ہے جس کی ابھی تیسری ٹیسٹنگ ہونا باقی ہے اس ویکسین پر سیاست نہیں ہونی چاہیے اور اس ویکسین کو لیکر بہت چوکنّا رہنے کی ضرورت ہے کیونکہ یہ انسان کی زندگی کا سوال ہے۔
واضح رہے کہ ضلع مرادآباد میں کورونا ویکسین لینے کے محض 24 گھنٹے کے اندر وارڈ بوائے مہیپال کی موت ہوگئی۔مہیپال کے اہل خانہ نے الزام لگایا ہے کہ کووڈ ویکسین لینے کے بعد مہیپال کی حالت بگڑ گئی، جس کے بعد اتوار کی شام اس کی موت ہوگئی۔چیف میڈیکل افسر ایم سی گرگ نے بتایا کہ مہیپال کو سینے میں درد اور سانس لینے میں تکلیف ہونے کے بعد اسپتال میں داخل کرایا گیا تھا جہاں اس کی موت ہوگئی۔
خیال رہے کہ گذشتہ 16 جنوری2021 کو مہیپال نے کورونا کا ٹیکہ دوپہر بارہ بجے لگوایا تھا۔
