ایک اور شخص ہجومی تشدد کا شکار

ریاست اترپردیش کے دار الحکومت لکھنؤ سے ہجومی تشدد کا ایک اور معاملہ سامنے آیا ہے جہاں ایک معمر شخص کو گاؤں کے لوگوں نے چوری کے شبے میں پیٹ پیٹ کر ہلاک کردیا۔

ریاست اترپردیش کے دار الحکومت لکھنؤ کے گوسائی گنج پولیس اسٹیشن کے تحت واقع کبیر پور گاؤں کا ہے جہاں چوری کے شبے میں ایک ادھیڑ عمر شخص کو ہجوم نے پیٹ پیٹ کر ہلاک کردیا ہے۔ تاہم اطلاع ملنے پر پولیس موقع پر پہنچ گئی اور لاش کو قبضہ میں لےکر پوسٹ مارٹم کے لئے بھیج دیا، ابھی تک مرنے والے کی شناخت نہیں ہوسکی ہے۔

جب پولیس نے معلومات حاصل کرنے کے لئے گاوں والوں سے بات کرنے کی کوشش کی تو گاؤں والوں اور پولیس کے درمیان جھڑپ ہوگئی۔کہا جاتا ہے کہ یہ شخص گاؤں کے باہر کا ہے جو سامان بیچنے کے لئے گاؤں آتا تھا۔ اسی وقت کچھ گاوں والوں نے اسے چوری کے شبہ میں قتل کردیا۔پولیس فورس کی ایک بڑی تعداد وہاں پر تعینات کردی گئی ہے لیکن ابھی تک پولیس کو یہ پتہ نہیں چل سکا ہے کہ ہلاک ہونے والا شخص کون ہے اور یہ واقعہ کس وجہ سے پیش آیا ہے۔پولیس اس معاملے کی چھان بین کر رہی ہے۔