علی گڑھ مسلم یونیورسٹی کے پراکٹر پروفیسر وسیم علی نے بتایا کہ اشرف علی کو 3 روز قبل آخری بار کیمپس کے قریب موجود شمشاد مارکٹ میں دیکھا گیا جہاں اس کی کچھ طلبا سے ملاقات ہوئی تھی جس کے بعد سے وہ لاپتہ ہے اور اس کا موبائل فون بھی بند ہے۔
پراکٹر پروفیسر محمد وسیم علی نے اس سلسلہ میں ایک پریس کانفرنس منعقد کی اور بتایا کہ اشرف کی گمشدگی کے بعد سے اس کا فون سرویلنس پر ہے جبکہ اس کا آخری لوکیشن دہلی بتایا گیا۔
انہوں نے کہا کہ 'ہم لوگ اپنی سطح پر بھی تلاش کررہے ہیں اور اس سلسلہ میں تھانہ سول لائن علیگڑھ میں ایک تحریری شکایت بھی درج کی گئی ہے۔'
انہوں نے بتایا کہ پولیس کی ایک ٹیم دہلی میں اشرف علی کو تلاش کر رہی ہے لیکن ابھی تک کوئی سراغ نہیں ملا ہے۔ پروفیسر وسیم علی نے مزید بتایا کہ ابتدائی تحقیقات میں پتہ چلا ہے کہ اشرف علی کی دہلی کی کسی لڑکی سے فون اور واٹس ایپ پر رابطہ میں تھا۔ انہوں نے کہا کہ اشرف علی کے افراد خاندان سے مسلسل رابطہ کیا جارہا ہے۔
اشرف علی کا تعلق بہار کے ضلع ارریہ سے ہے جو اے ایم یو کے سر سید ہال (ساؤتھ) مشتاق منزل میں رہتے تھے۔
