ریاست اتر پردیش کے گریٹر نوئیڈا کے ربو پورہ علاقہ میں کھیت سے واپس آرہی ایک کمسن بچی کو دو نوجوانوں نے بہلا پھسلا کر اپنی بائک پر بٹھایا اور جنگل میں لے جاکر اس کے ساتھ جنسی زیادتی کی۔ متاثرہ افراد کے لواحقین کی شکایت پر پولیس نے مقدمہ درج کرکے دونوں ملزموں کو گرفتار کر انہیں جیل بھیج دیا۔ پولیس نے بتایا کہ 'یہ واقعہ 7 اکتوبر کو پیش آیا تھا۔
جانکاری کے مطابق کوتوالی ربوپورہ کی پولیس نے گرفتار ملزم ارجن اور راکیش پر 13 سال کی نابالغ کے ساتھ اجتماعی جنسی زیادتی کا الزام عائد کیا ہے۔ ڈی سی پی ویمن کرائم سیکیورٹی وریندا شکلا نے بتایا کہ '7 اکتوبر کو تھانہ ربوپورہ کے گاؤں فلودہ میں ایک 13 سالہ نابالغہ اپنے کھیت پر گئی تھی اور جب وہ واپس آرہی تھی تو اس گاؤں کے جان پہچان کے دو نوجوانوں نے اسے گھر چھوڑنے کے بہانے اپنی موٹرسائیکل پر بٹھایا اور زبردستی اسے جنگل میں لے گئے، جہاں دونوں نے نابالغہ کے ساتھ زیادتی کی اور فرار ہوگئے۔
متاثرہ لڑکی نے یہ اطلاع اپنے اہل خانہ کو دی جس کے بعد اہل خانہ نے ملزم ارجن اور راکیش کے خلاف تھانہ ربوپورہ میں مقدمہ درج کیا۔ جنسی زیادتی کرنے والے دونوں ملزمان کو آج پولیس نے حراست میں لیا ہے، ان دونوں کی عمر 21 سے 22 سال ہے، جبکہ متاثرہ لڑکی کو میڈیکل کے لیے بھیجا گیا ہے اور ملزم کے خلاف ضروری کارروائی کی جارہی ہے۔
واضح رہے کہ دادری میں دو روز قبل ساتویں جماعت میں زیر تعلیم نابالغہ کے ساتھ اجتماعی جنسی زیادتی کا معاملہ منظرعام پر آیا تھا۔
