اترپردیش کے ضلع مظفر نگر میں تسلیم شدہ اسکول کے پرنسپل اور اساتذہ نے اپنے مختلف مطالبات کے پیش نظر آج وزیر اعلی کے نام ضلع انتظامیہ کو ایک میمورنڈم پیش کیا۔
میمورنڈم کے ذریعے اساتذہ کا کہنا تھا کہ ایک ماہ قبل درجہ ایک سے درجہ پانچ تک کے اسکولز کو وزیر اعلی کے احکامات پر عمل کرتے ہوئے کھولے گئے تھے۔ حکومت نے ایک بار پھر 24 مارچ سے 11 اپریل تک چھٹیوں کے احکامات جاری کردئے ہیں جس کے بعد سے بچوں کے والدین نے پچھلے سیشن کی طرح فیس کی ادائیگی بند کر دی ہے اور نئے داخلے کے کام میں بھی خلل پڑا ہے۔
اساتذہ کا کہنا ہے کہ 'گزشتہ 20/ 2019 میں بھی حکومت کے احکامات پر بغیر امتحان کے طلباء کو اگلے درجے میں پرموٹ کیا گیا تھا اور اس سیشن 2020 ۔ 21 میں بھی حکومت کے حکم پر بغیر امتحان کے طلباء و پرموٹ کیا گیا ہے جبکہ اس سیشن میں آن لائن اور آف لائن دونوں ہی طریقوں سے تعلیم دی گئی تھی لیکن بغیر امتحانات کے مسلسل دونوں سیشن میں طلبا کو پروموٹ کرنا یقینی طور پر کہیں نہ کہیں ان کے مستقبل پر سوالیہ نشان کھڑا کرتا ہے۔
اس لئے ہم اساتذہ حکومت سے مطالبہ کرتے ہیں کہ '11 اپریل کے بعد سے اسکولز کی چھٹیوں میں توسیع نہ کریں اور کووڈ 19 کی ہدایت کے مطابق اسکولز کو 20 مئی تک کھولنے کا حکم جاری کریں جس سے طلبا کی تعلیمی نقصان نہ ہو اور نئے سیشن کی تعلیم شروع ہوسکے۔ '
