بہراج پولیس نے موقع پر پہنچ کر لاش کو پوسٹ مارٹم کے لیے بھیج دیا اور مقتول کے بیٹے کی تحریر شکایت کے بعد بھائی اور دیگر چار افراد کے خلاف قتل کا مقدمہ درج کرلیا گیا۔
بہرائچ کے تھانہ خیری گھاٹ میں علی نگر گاؤں کے رہنے والے 50 سالہ رام چندر ولد لال بہادر کا اپنے بھائی شتروگھن کے ساتھ زمین کے مسئلہ پر دیرینہ تنازعہ چل رہا تھا۔ رام چندر گاؤں سے تقریبا ڈیڑھ کلومیٹر کے فاصلے پر واقع اپنے کھت کی حفاظت کے لیے ہفتے کی رات گیا تھا لیکن معمول کے مطابق وہ اتوار کی صبح گھر واپس نہیں آیا جس کے بعد اسے تلاش کیا گیا۔
بیٹے بھیکھو کو رام چندر کی خون میں لت پت لاش کھیت میں بستر پر ملی۔ رام چندر کا بے دردی سے گلا کاٹ کر قتل کیا گیا تھا۔
بھیکھو کی اطلاع کے بعد تھانہ ایس ایچ او پنکج کمار سنگھ پولیس فورس کے ساتھ موقع پر پہنچ گئے جس کے بعد اے ایس پی اشوک کمار، سی او مہسی شنکر پرساد بھی وہاں پہنچ گئے۔
پوسٹ مارٹم کے بعد رام چندر کی لاش کو لواحقین کے حوالہ کردیا گیا۔ اس موقع پر اشوک کمار نے بتایا کہ مقتول کے بیٹے وکرم پرساد نے زمین کے تنازعہ کو قتل کی وجہ بتاتے ہوئے اپنے چچا شتروگھن اور چار چچازاد بھائیوں پر رام چندر کے قتل کا الزام عائد کیا۔ پولیس نے تمام پانچ افراد کے خلاف مقدمہ درج کرکے تحقیقات کا آغاز کردیا ہے اور ملزمین کی گرفتاری کےلیے تلاش شروع کردی ہے۔
