مئو: حکومت کی سخت گائیڈ لائن کے سبب مدارس میں تعلیمی سرگرمیاں متاثر

اترپردیش کے ضلع مئو میں درس و تدریس کا عمل مدارس میں اب بھی اطمنان بخش نظر نہیں آرہا ہے۔ مدارس عربیہ کے دارالاقامہ کے لئے جاری گائیڈ لائن سے ذمہ دار کافی محتاط ہیں۔ گائیڈ لائن کی شرائط اتنی سخت ہیں کہ اس پر مدارس کا عمل پیرا ہونا بہت مشکل ہے۔ ان حالات سے خائف مدارس عربیہ کے ذمہ داروں نے فی الحال دارالاقامہ بند رکھنے کا فیصلہ کیا ہے۔ اس کا اثر مدارس میں درس و تدریس پر پڑ رہا ہے۔

مدارس کے ذمہ دار کہتے ہیں کہ جب تک ہاسٹل میں طلبہ کی رہائش کے سلسلے میں قابل عمل گائیڈ لائن جاری نہیں ہوتی، اسے شروع نہیں کیا جائےگا۔

مدارس عربیہ میں بیشتر طلباء دارالاقامہ میں ہی قیام کرتے ہیں۔ یہاں کمروں کی تعداد اتنی نہیں ہے کہ موجودہ گائیڈ لائن پر عمل کرتےہوئے تمام طلباء کو رکھا جا سکے۔

حکومت اترپردیش کے ذریعہ جو گائیڈ لائن جاری کی گئی ہے۔ اس کے مطابق ایک کمرے میں صرف چار طلبہ ہی قیام کر سکتےہیں۔ عام حالات میں ہاسٹل کے ایک کمرے میں دس طلبا قیام کرتے ہیں۔

اترپردیش حکومت کی جاری کردہ گائیڈ لائن کے مطابق دارالاقامہ میں رہائش کے دوران طلبہ کمروں میں ایک میٹر کا فاصلہ رکھیں گے۔

موجودہ گائیڈلائن پر عمل کرنے کی صورت میں مدارس میں طلبہ کی تعداد صرف چالیس فیصد رہ جائےگی۔

یہی وجہ ہے کہ مدارس کے ذمہ دار فی الحال گائیڈ لائن پر عمل کرنے کے بجائے دارالاقامہ بند رکھنے پر مجبور ہیں۔ انہیں حکومت سے مدارس کے لئے آسان گائیڈلائن کا انتظار ہے۔