نوئیڈا میں سماجوادی پارٹی مہانگر لوہیا واہنی کی جانب سے احتجاج میں لکھیم پور کھیری تشدد میں متاثرہ کسانوں کو خراج عقیدت پیش کیا گیا جب کہ اس دوران اتر پردیش اور مرکزی حکومت کے خلاف نعرہ بازی کی گئی۔
لوہیا واہنی کے کارکنان نے یوپی حکومت اور مرکزی وزیر مملکت برائے داخلہ کو برطرف کرنے اور ملزمین کی جلد گرفتاری کا مطالبہ بھی کیا۔
مظاہرے کی قیادت کرتے ہوئے لوہیا واہنی کے مہانگر صدر عظیم علی زیدی نے کہا کہ حکومت کسانوں کی تحریک کو دبانے کے لیے وحشیانہ رویہ اختیار کررہی ہے۔
انہوں نے مطالبہ کیا کہ کسانوں کے قاتلوں کو فوری سزادی جائے اور تینوں زرعی قوانین واپس لئے جائیں۔
عظیم زیدی نے مزید کہا کہ 'حکومت اپنے گناہوں پر پردہ داری کے لیے اپوزیشن جماعتوں کے رہنماؤں کو لکھیم پور کھیری جانے سے روک رہی ہے اور غیر جمہوری طریقہ اختیار کرتے ہوئے ہراساں کررہی ہے۔
انہوں نے کہا کہ 'بی جے پی کی مرکزی اور ریاستی حکومتیں جمہوریت کا گلا گھونٹ رہی ہیں جسے برداشت نہیں کیا جاسکتا۔ سماج وادی پارٹی کسانوں کے حق میں آواز اٹھاتی رہے گی۔
