ملک میں کورونا وائرس کو پھیلنے سے روکنے کے لیے لاک ڈاؤن کیا گیا ہے جس کے بعد دہلی اور دیگر مقامات سے مزدور طبقہ اپنے گھروں کی جانب چل کوچ کرنے لگے۔ ان کے گھر جانے کی وجہ سے کورونا وائرس کے پھیلنے کے خطرات مزید بڑھ گئے ہیں۔
ریاست اترپردیش کے وزیر اعلی یوگی آدتیہ ناتھ نے ایک بڑا فیصلہ لیتے ہوئے اپنی ریاست میں مسافروں کی آمد پر مکمل باندی لگانے کا فرمان جاری کیا ہے تو اسی کے پیش نظر ضلع رامپور کی شاہراہ پر بھی آمد و رفت نہ کے برابر نظر آئی۔
کورونا وائرس کو پھیلنے سے روکنے کے لیے ملک بھر میں لاک ڈاؤن جاری ہے۔ اس درمیان تمام کام بند ہو جانے کے سبب ہزاروں کی تعداد میں مزدور طبقہ سیکڑوں میل دور اپنے گھروں کے جانب روانہ ہونے لگے۔
بس اسٹیشن سے لے کر قومی شاہراہوں پر انسانی سروں کی ایسی قطاریں بنیں کہ ارد گرد کی ریاستوں کے اضلاع کے باشندوں میں کورونا وائرس کا خوف مزید بڑھ گیا ہے۔
ادھر لوگوں نے سوالات کھڑے کرنا شروع کر دیے ہیں کہ جس کورونا وائرس کے خطرے سے نمٹنے کے لیے ایک جگہ جمع ہونے سے روکنے کے لیے حکومت نے لاک ڈاؤن نافذ کیا ہے، تو اتنی بڑی تعداد میں لوگ اپنے گھروں کو روانہ ہوئے ہیں تو کیا ا سے کورونا وائرس کو پھیلنے میں تقویت نہیں ملے گی؟
یہی وجہ ہے کہ اترپردیش حکومت نے آئندہ کے لیے لاک ڈاؤن کے درمیان ریاست کے تمام اضلاع میں باہری اضلاع سے آنے والے لوگوں پر مکمل روک لگانے کا فیصلہ کیا ہے۔
وزیر اعلی کے فیصلے کے بعد جہاں آج باہری اضلاع سے آنے والے مسافروں میں کمی نظر آئی تو وہیں رامپور انتظامیہ بھی اس معاملے میں آج کافی مستعد نظر آئی۔ اس دوران جو بھی تھوڑے بہت لوگ رامپور ضلع میں داخل ہوئے تو پہلے ان کا میڈیکل چیک اپ کیا گیا اور ان کو سینیٹائز کرکے ان کے گھروں کے لیے رخصت کیا گیا۔
