ضلع بدایوں کے ہیڈکوارٹر یعنی شہر بدایوں کے اہم چوراہوں پر لگی انتخابی دکانیں اپنے آپ میں اہمیت کی حامل ہیں۔ یہ دکانیں ہر 5 برس کے بعد یا پھر وسط مدتی اور ضمنی انتخابات ہونے پر لگائی جاتی ہیں۔
عارضی طور پر لگائی جانے والی ان چھوٹی چھوٹی انتخابی دکانوں میں اس وقت اترپردیش میں جاری پنچایتی انتخابات کے حوالے سے انتخابی نشانات، پمپلیٹ اور پرچیاں فروخت کی جاتی ہیں۔
انتخابی نشان فروخت کرنے والے ایک چھوٹے تاجر ارون کمار کا کہنا ہے کہ 'لاک ڈاؤن جیسے حالات کی وجہ سے پریشانیاں بہت بڑھ گئی ہیں۔ ہم اس سامان کو فروخت کر کے گزر بسر کر رہے ہیں۔ یہی دکان ہمارا سہارا ہے اور انتخابات ختم ہونے کے بعد اس کاروبار کو بھی بند کرنا پڑے گا۔'
دکان پر سامان خریدنے کے لیے آئے ایک اور فرد کا کہنا تھا کہ اب لاک ڈاؤن ہے اور ان دکانداروں کے حالات بد سے بدترین ہو جائیں گے اور اس طرح کے لوگوں کو مسلسل مختلف مشکلات کا سامنا ہے۔
واضح رہے کہ ریاست اتر پردیش میں پنچایتی انتخابات جاری ہیں اور ضلع بدایوں میں پنچایتی انتخابات کے لیے گاؤں پنچایت، علاقائی پنچایت اور ضلع پنچایت انتخابات کی ووٹنگ 19 اپریل 2021 کو ہونی ہے۔ اس ووٹنگ سے پہلے انتخابی تشہیر کے ختم ہونے کے ساتھ ہی ان چھوٹے دکانداروں کے کاروبار کی امید بھی ختم ہو رہی ہے۔
