ایسا ہی کچھ دیکھنے کو ملا آج ریاست اترپردیش کے رامپور کے بس اسٹیشن پر جہاں بڑی تعداد میں یومیہ مزدور جمع ہوکر اپنے گھروں کو واپس جانے کا انتظار کر رہے ہیں۔
لاک ڈاؤن کے تیسرے راؤنڈ کے بعد آخر حکومت نے مزدوروں کو ان کے گھروں پر واپس بھیجنے کا فیصلہ کر ہی لیا ہے۔ یہی وجہ ہے کہ اپنے گھروں کے لئے پیدل نکلے مزدور اب ریلوے اسٹیشن اور بس اڈوں پر جمع ہونا شروع ہوگئے ہیں۔
چار دن سے رامپور کے بس اسٹیشن پر جمع سیکڑوں کی تعداد میں یہ مزدور اس امید کے ساتھ یہاں ٹھہرے ہوئے ہیں کہ ان کو ان کے گھروں تک روڈویز بسوں کے ذریعہ روانہ کیا جائے گا۔
سینکڑوں میل کا سفر پیدل طے کرکے رامپور پہنچنے والے ان مزدوروں کا کہنا ہے کہ پیدل چلتے چلتے ان کے پیروں میں سوجن آ گئی ہے وہ اب اس سے زیادہ پیدل نہیں چل سکتے۔
ساتھ ہی ان کے پاس جو پیسے بچے تھے وہ بھی اب ختم ہو چکے ہیں۔ اس لئے ان کو کسی بھی سواری گاڑی کے ذریعہ گھر روانہ کیا جائے۔
بہرحال یہاں ان مزدوروں کے لئے بسوں کا نظم تو کیا جا رہا ہے لیکن اب دیکھنا یہ ہوگا کہ ان کو اپنے گھروں تک پہنچنے کے لئے کتنا اور انتظار کرنا پڑیگا۔