رامپور: اغوا کیے گئے معصوم بچے کی لاش برآمد

اترپردیش کے ضلع سنبھل سے اغوا کیے گئے دس سالہ معصوم بچے کی لاش ضلع رامپور سے برآمد ہوئی ہے۔ پولیس نے ملزم کو گرفتار کر لیا ہے۔ پوچھ گچھ کے دوران ملزم نے اپنا جرم قبول کر لیا ہے۔

ریاست اترپردیش کے ضلع رامپور میں اغوا کے بعد رقم نہ ملنے پر ایک بچے کے قتل کا معاملہ سامنے آیا ہے۔ ہفتہ کے روز صبح بچے کی لاش رامپور کے پیپلی جنگل میں ملنے کی اطلاع ملتے ہی سرپرستوں میں کہرام مچ گیا۔

موقع پر پہنچی پولیس نے لاش کو اپنے قبضہ میں لے کر معاملے کی تفتیش شروع کر دی ہے۔

اطلاع کے مطابق سنبھل کے صدر کوتوالی علاقے کے ہلو سرائے محلے کا باشندہ سرجیت کمار جو پواسا بلاک میں دیہی افسر کے عہدے پر تعینات ہیں۔ ان کا درجہ چار میں پڑھنے والا 10 سالہ معصوم بچہ یوراج کا بدمعاشوں نے اغوا کر لیا تھا، جسے چھوڑنے کے لیے اغواکاروں نے 8 لاکھ روپے کی مانگ کی تھی۔ جو پوری نہ ہونے پر بدمعاشوں نے معصوم کا گلا گھونٹ کر قتل کر دیا اور لاش کو رامپور کے تھانہ ملک قانم کے پیپلی جنگل میں پھینک دیا۔

ارون کمار سنگھ، اے ایس پی رامپور

اس معاملہ میں پولیس نے سی سی ٹی وی فوٹیج کی مدد سے ایک ملزم کو گرفتار کر لیا ہے۔ گرفتار بدمعاش نے پولیس پوچھ گچھ میں بچے کے قتل کے جرم کو قبول کر لیا ہے۔ ملزم کی نشاندہی پر بچے کی لاش کو رامپور کے پیپلی جنگل سے برآمد کیا۔