ریاست اتر پردیش کے ضلع ہاپوڑ میں اس وقت افراتفری پھیل گئی جب اترپردیش اے ٹی ایس نے مقامی پولیس کے ساتھ مل کر ایک پتھر کے تاجر کے شو روم کو چاروں جانب سے گھیر کر دو افراد کو گرفتار کرلیا۔ اے ٹی ایس کے مطابق، دونوں ملزم خالصتان عسکریت پسندوں کو اسلحہ فراہم کرتے تھے۔ گرفتار جاوید اصل میں میرٹھ ضلع کے تھانہ کٹھور علاقے کے رادھنا گاؤں کا رہائشی ہے۔
پولیس کے مطابق، ملزم نے تفتیش کے دوران بتایا کہ 'اس نے لدھیانہ میں آر ایس ایس کے ایک سینئر رضاکار رویندر گوسائی کے قتل کے لیے اسلحہ فراہم کیا تھا۔ اہم بات یہ ہے کہ رویندر گوسائی کو اکتوبر 2016 میں لدھیانہ میں قتل کر دیا گیا تھا۔ این آئی اے اس واقعے کی تحقیقات کر رہی تھی۔ ایک سال قبل جب این آئی اے اور اے ٹی ایس کی ٹیم رادھنا گاؤں پہنچی تھی تب ان پر بھی حملہ ہوا تھا۔
اے ٹی ایس کے ایڈیشنل ڈائریکٹر جنرل دھروکانت ٹھاکر نے بتایا کہ 'اسلحہ اسمگلنگ کیس میں پنجاب پولیس طویل عرصے سے جاوید کی تلاش میں تھی۔ اے ٹی ایس ذرائع کے مطابق، ٹیم نے پنجاب پولیس کو جاوید کی گرفتاری سے آگاہ کیا ہے۔ جلد ہی پنجاب پولیس کی ایک ٹیم لکھنؤ پہنچے گی اور ملزم کو اپنے ساتھ لے جائے گی۔
