دراصل اعلیٰ حضرت کا خصوصی عرس رضوی شہر کے ایف آر اسلامیہ انٹر کالج کے میدان میں منعقد ہوتا ہے لیکن تاج الشریعہ مرحوم اختر رضا خاں کے تعمیر کردہ مدرسہ جامعۃ الرضا میں منعقد ہونے والے عرسِ اعلیٰ حضرت کی اپنی انفرادی اہمیت ہے۔
اسی سلسلے میں جماعت رضائے مصطفےٰ کی جانب سے متُھرا پور واقع مدرسہ جامعۃ الرضا میں ہونے والے تین روزہ عرس اعلیٰ حضرت کی تقاریب کا اعلان کرتے ہوئے علیحدہ پوسٹر جاری کیا گیا ہے۔ حالانکہ درگاہ اعلیٰ حضرت کے سجادہ نشین حضرت احسن رضا خاں کی قیادت میں عرسِ اعلیٰ حضرت یعنی عرس رضوی کا پوسٹر پہلے ہی جاری ہو چکا ہے۔
متھرا پور میں ہونے والے تین روزہ عرس اعلیٰ حضرت کی سبھی تقاریب شہزادہ تاج الشریعہ مفتی اسجد رضا خاں کی سرپرستی میں منعقد ہوں گی۔ تقاریب کی صدارت جماعت رضائے مصطفےٰ کے نائب صدر سلمان میاں کریں گے۔ ملک اور بیرونی ممالک میں ای میل اور وہاٹس ایپ کے ذریعے عرس کے پوسٹر بھیج دئے گئے ہیں۔
پروگرام کے مطابق تین روزہ عرس میں 23 اکتوبر کو بعد نماز فجر قرآن خوانی اور نعت کا دور ہوگا۔ صبح 7 بجکر 10 منٹ پر جیلانی میاں کے قُل کی رسم ادا کی جائے گی۔ اسی دن رات میں 10 بجکر 38 منٹ پر حجتہ الاسلام حامد رضا خاں کے قل کی رسم ادا ہوگی۔
دوسرے دن یعنی 24 اکتوبر کو قرآن خوانی، نعت و منقبت کا سلسلہ جاری رہےگا اور شام کو 7 بجکر 14 منٹ پر حضور تاج الشریعہ مفتی اختر رضا خاں کے قل کی رسم ادا کی جائےگی۔ اسی شب رات میں بعد نماز عشاء امام احمد رضا کانفرنس میں جشنِ دستار علم و فضیلت کا پروگرام منعقد کیا جائے گا۔ اسی شب رات کے آخری پہر میں 1 بجکر 4 منٹ پر مفتی اعظم ہند حضور مصطفےٰ رضا خاں کے قل کی رسم ادا کی جائے گی۔
عرس کے آخری روز یعنی 25 اکتوبر کو صبح بعد نماز فجر قرآن خوانی سے پروگرام کا آغاز کیا جائے گا۔ اس میں باہر سے تشریف لانے والے علماء و مشائخ، مقرر اور نعت خواں کا تقریری اور نعت گوئ کا پروگرام ہوگا۔ پھر لاکھوں زائرین اور مُریدین کی حاضری کے درمیان سنی مسلمانوں کے مزہبی رہنما اعلیٰ حضرت امام احمد رضا خاں فاضلِ بریلوی کے 101واں عرس کے قل کی رسم دوپہر 2 بجکر 38 منٹ پر ادا کی جائے گی۔ اسکے ساتھ ہی تین روزہ عرس کا اختمام ہوگا۔ قل کی رسم کے دوران خصوصی دعائیہ کلمات مفتی اسجد رضا خاں ادا کریں گے۔
