جماعت اسلامی یو پی مشرق کے امیر حلقہ ڈاکٹر ملک فیصل فلاحی نے آل انڈیا مسلم پرسنل لا بورڈ کے نائب صدر مولانا کلب صادق کے انتقال پر اپنے رنج و غم کا اظہار کرتے ہوئے کہا کہ مولانا کی شکل میں قوم نے ملی اتحاد کے علمبردار ایک عظیم رہنما کو کھو دیا ہے۔
انہوں نے کہا کہ مولانا کی رحلت سے جو خلا پیدا ہوا ہے اسے پورا نہیں کیا جاسکتا، مولانا تاعمر ملی اتحاد اور قوم کے نوجوانوں کو اعلی تعلیم سے آراستہ کرنے کی ہمہ تن کوشش کرتے رہے، وہ سرسید کے اصل جانشین تھے۔
انہوں نے کہا کہ اپنے تعلیمی مشن کے تحت ملت کے نونہالوں کو اعلی تعلیم سے آراستہ کرنے کے لیے جو متعدد ادارے قائم کیے ہیں، ملت ان سے صدیوں تک مستفید ہوتی رہے گی، ان کے مشن کو فروغ دینا ہی ان کے لیے سچا خراج عقیدت ہوگا۔
ڈاکٹر فیصل نے اپنے تعزیتی پیغام میں کہا کہ ڈاکٹر صاحب ایک عالم دین، متقی و پرہیزگار، بہترین خطیب، ماہر تعلیمات،کامیاب سماجی رہنما اور قوم کی فلاح وبہبود کے لیے ایک مخلص قائد اور اس کے تئیں جہد مسلسل کے پیکرتھے۔ اسلامی علوم کے ماہر ہونے کے ساتھ وہ ملک وملت کے مسائل پر بڑی گہری نظر رکھتے تھے اور اپنے موقف کا بربلا اظہار کرتے تھے۔
مرحوم کو یاد کرتے ہوئے امیر حلقہ نے کہا کہ ڈاکٹر صادق جماعت اسلامی کے زیر اہتمام اجلاس میں شرکت کر کے اپنے قیمتی خطابات سے مستفید کرتے تھے۔مختصر الفاظ میں وسیع معنی کا احاطہ ان کی امتیازی خصوصیت تھی ملت کے ہر حلقے میں مقبول تھے برادران وطن میں بھی قدرومنزلت کی نگاہ سے دیکھے جاتے تھے۔
انہوں نے مرحوم کے بلند درجات و تسکین روح کی دعا کرتے ہوئے کہا کہ مولانا ان چنندہ اشخاص میں سے تھے جو صدیوں میں پیدا ہوتے ہیں اور اپنے کارناموں اور قربانیوں کی وجہ سے لوگوں کے دلوں میں ہمیشہ زندہ رہتے ہیں۔مولانا نے انفرادی طور سے جو ناقابل فراموش خدمات انجام دیں ہیں ان کو کبھی فراموش نہیں کیا جاسکتا۔
مندوب میں شامل جامعۃ الفلاح میں شعبہ دعوت و ارشاد کے ڈائرکٹر مولانا طاہر مدنی نے اپنے تعزیتی پیغام میں کہا کہ سادگی و منکسر المزاجی آپ کا خاص وصف تھا۔مرحوم نے اپنی دینی اور علمی خدمات کے گہرے نقوش چھوڑے ہیں جو ہمیشہ یاد رکھے جائیں گے۔آپ کی رحت سے ملت کو ایک کاری زخم لگا ہے جس کی کسک نہ معلوم کب تک محسوس کی جاتی رہے گی۔
