مرحوم سید محمد افضل نے جس ماحول میں پرورش پائی وہ بے حدپاکیزہ، تعلیم یافتہ اور روحانی تھا، 1954ء میں ایٹہ ضلع کے مارہرہ میں پیدا ہوئے، ابتدائی تعلیم یہیں حاصل کی۔ مارہرہ مطہرہ سے ہائی اسکول پاس کرکے 1978ء میں اعلیٰ تعلیم کے لیے علی گڑھ مسلم یونیورسٹی کا رخ کیا، یہاں سے ایل ایل بی اور ایل ایل ایم کیا۔ 'پولیس اسٹریس' ڈاکٹریٹ کا بہترین مقالہ لکھا۔ 1990ء میں آئی پی ایس کے امتحان میں اردو سبجیکٹ کے ساتھ کامیابی حاصل کی اور مدھیہ پردیش کیڈر میں ریاست کے مختلف علاقوں میں ایس پی، ڈی ایس پی، آئی جی اور اے ڈی جی پی کے عہدوں پر رہ کر قوم کی گراں قدر خدمات انجام دیں۔
ای ٹی وی بھارت سے بات چیت میں کہا کہ مرحوم اردو سبجیکٹ رکھ کر آئی پی ایس امتحان پاس کرنے والے پہلے سول سرونٹ بنے جبکہ آپ سے قبل آپ ہی کے برادر سید محمد اشرف نے اردو سبجیکٹ سے آئی آر ایس کا امتحان پاس کیا تھا۔ دونوں بھائیوں نے احساس کمتری کا شکار اردو برادری کو پیغام دیا کہ اردو مضمون اختیار کر کے بھی سول سروسز کے امتحانات پاس کیے جا سکتے ہیں۔
سید محمد افضل کا ایک طرۂ امتیاز یہ بھی رہا کہ تیس برس سے زائد عرصہ تک پولیس جیسے محکمہ میں آپ نے اپنے دامن کو داغدار ہونے سے بچائے رکھا اور بالآخر وہ وقت آیا جب صدر جمہوریہ نے آپ کو بے داغ آئی پی ایس افسر کے طور پر خدمات انجام دینے کے عوض ایوارڈ سے نوازا ۔ اس طرح آپ کے ہاتھوں قوم کی یہ خدمت تاریخ کا حصہ بن گئی اور سرکاری محکموں میں کام کرنے والوں کو ایمانداری، دیانتداری اور وفاداری کا پیغام دے گئی۔
انہوں نے کہا کہ آپ نے علی گڑھ مسلم یونیورسٹی، علی گڑھ اور جامعہ ملیہ اسلامیہ، نئی دہلی میں رجسٹرار کے طور پر بھی گراں قدر خدمات انجام دیں۔ اس عہدے پر رہ کر آپ کی خدمات آج بھی لوگوں کے ذہنوں میں محفوظ ہیں۔
مارہروی کی پوری زندگی کھلی کتاب کے مانند تھی، اتنے عظیم منصب پر فائز ہونے کے باوجود آپ نے تعلیم و تعلم سے کبھی ناطہ نہیں توڑا بلکہ ایک طرف وقتاً فوقتاً عظیم دانش گاہوں میں توسیعی خطبات کے توسط سے تدریسی فریضہ انجام دیتے رہے تو دوسری طرف علی گڑھ میں 'البرکات ایجوکیشنل سوسائٹی' قائم کر کے تعلیم کا ایک شہر بسانے میں کلیدی کردار ادا کیا۔
