علی گڑھ :علیگڑھ مسلم یونیورسٹی کے انتظامیہ بلاک کے کانفرنس ہال میں کارگزار وائس چانسلر پروفیسر گلریز اور رجسٹرار محمد عمران کی صدارت میں یوم آزادی کی تقریبات کے سلسلہ میں ایک مشاورتی میٹنگ کا اہتمام کیا گیا.اس میں یونیورسٹی اسکولوں کے پرسنل، ہال کے پرووسٹ، ڈین اسٹوڈنٹس ویلفیئر پروفیسر علیم سمیت یونیورسٹی کے سبھی متعلقہ اہلکار موجود رہے۔
مشاورتی میٹنگ میں پروفیسر گلریز نے یوم آزادی کو روایتی جوش و خروش کے ساتھ منانے کے عزم کا اعادہ کیا۔ انھوں نے کہاکہ یہ جشن بہت اہمیت رکھتا ہے کیونکہ ملک ’آزادی کا امرت مہوتسو‘ منا رہا ہے اور جی 20 سربراہی اجلاس منعقد کر رہا ہے۔
اے ایم یو رجسٹرار محمد عمران نے کہا کہ یوم آزادی کے موقع پر یونیورسٹی پولی ٹیکنک آڈیٹوریم میں ایک روایتی مشاعرہ منعقد کیا جائے گا، جو اتحاد اور حب الوطنی کے جذبے کا اظہار ہے اور اس سے یوم آزادی کی ثقافتی رونق میں اضافہ ہوگا۔
یہ بھی پڑھیں:Urdu PHD 'اردو کو ختم کرنے کی اے ایم یو انتظامیہ کی سازش'
واضح رہے اے ایم یو میں جشن یوم آزادی کی تقریبات کا آغاز 14 اگست کی شب میں کل ہند مشاعرے سے ہوتا ہے۔ یوم آزادی کے روز صبح یونیورسٹی کے تاریخی اسٹریچی ہال پر پرچم کشائی کی جاتی ہے۔ یونیورسٹی کے اسکولوں میں بھی جشن یوم آزادی سے متعلق مختلف قسم کے پروگراموں کا بھی اہتمام کیا جاتا ہے جس میں طلباء و طالبات بڑھ چڑھ کر حصہ لیتے ہیں۔
