ریاست اتر پردیش کے ضلع بارہ بنکی میں سنیچر کے روز ضلع مجسٹریٹ اور پولیس سپریٹینڈنٹ نے شہر کے بازار اور خاص چوراہوں پر چیکنگ مہم چلائی۔ اس دوران دونوں افسران نے لوگوں کو پاس جا جا کر انہیں ماسک پہنوائے اور جن کے پاس ماسک نہیں تھے ان کا چالان کیا۔ اس دوران ٹریفک قوانین کی پابندی کے لئے بھی مزید چیکنگ کی گئی۔
ضلع مجسٹریٹ ڈاکٹر آدرش سنگھ نے بتایا کہ چیکنگ مہم کا مقصد عوام کو یہ بتانا ہے کہ کووڈ-19 کا خوف ابھی ختم نہیں ہوا ہے۔ ہر روز اس کی وجہ سے ہزاروں کی تعداد میں اموات ہو رہی ہیں۔
انہوں نے کہا کہ ماسک پابندی کے ساتھ پہنوانے کا بھی یہی مقصد ہے کہ عوام اسے سنجیدگی سے لے اور وہ ماسک پہنے تاکہ وہ اس وبا سے مخفوظ رہ سکیں۔
وہیں ایس پی ڈاکٹر اروند چترویدی نے بتایا کہ بازار میں آنے کا مقصد یہی ہے کہ ہم معائنہ کریں کہ یہاں کووڈ-19 کی گائیڈلائین پر عمل ہو رہا ہے یا نہیں۔ کیونکہ بازار وہ جگہ ہے جہاں صارفین اور دکاندار دونوں آسانی سے متاثر ہو سکتے ہیں۔
انہوں نے بتایا کہ ماسک نہ پہننے پر متعدد چالان کئے گئے ہیں، اس مہم کے ذریعہ انتظامیہ اور پولیس کے اہلکاروں نے ناجائز قبضے والوں کو بھی انتباہ کیا ہے۔
