کورونا بحران کے بیچ مغربی اترپردیش میں موسم اچانک بدل گیا ہے۔ یہاں کے متعدد اضلاع میں آندھی، بارش اور ژالہ باری سے ہونے والے نقصان سے کسان پریشان ہیں۔
اپریل کے مہینے میں اس بارش کے بعد درجہ حرارت میں بھی گراوٹ درج کی گئی ہے۔ لاک ڈاؤن کے چلتے لوگ گھروں کی چھتوں پر پہنچ کر موسم سے لطف اندوز ہوتے دیکھے گئے۔
اتراکھنڈ سے نزدیک ہونے کی وجہ سے مغربی اترپردیش کی سرحد سے متصل اضلاع میں موسم بدل گیا ہے۔ کل دوپہر اچانک آسمان میں گھنے بادلوں کی وجہ سے دن میں ہی اندھیرا چھا گیا تھا۔ گرمی کے موسم میں اس بارش نے لوگوں کو راحت بخشی ہے۔ وہیں دیہی علاقوں میں بارش کے ساتھ ژالا باری ہونے سے کاشتکاروں کا بہت بڑا نقصان ہوا ہے۔ ژالا باری کی وجہ سے کھیتوں میں گندم کی فصل کو نقصان پہنچا ہے اور زیادہ تر کھیتوں میں گندم کی فصل پوری طرح برباد ہوگئی ہے۔
بدایوں ضلع میں تیز آندھی کے بعد بارش کے باعث زندگی تعطل کا شکار ہو گئی ہے۔ ابھی بھی ضلع میں گندم کی 60 فیصد فصل کھیتوں میں ہے۔
آندھی اور اس کے بعد ہو رہی موسلادھار بارش کی وجہ سے گندم کی فصل میں کاشتکاروں کو بہت زیادہ نقصان ہونے کا امکان ہے۔ اس آندھی کی وجہ سے ضلع میں آم کی پیداوار کو بھی نقصان پہنچا ہے۔ لاک ڈاؤن کی وجہ سے عام آدمی پہلے ہی گھروں میں قید ہے۔ اس طرح زندگی درہم برہم ہو گئی ہے۔
