ریاست اترپردیش کے دارالحکومت لکھنؤ میں کانگریس کے ریاستی صدر اجے کمار للّو نے ہفتہ کو کہا کہ سیلاب زدہ علاقوں کا ہوائی جائزہ لےکر کاغذی خانہ پری کرنے کے بجائے وزرا اور افسران زمینی سطح پر سیلاب متاثرین کی مدد کریں اور انہیں راحت پہنچائیں۔
واضح رہے کہ مسٹر للو نے ہفتہ کو اپنے اسمبلی حلقے میں پپرا گھاٹ کے سیلاب زدہ علاقوں کا دورہ کیا۔
انہوں نے کہا حالات بے حد خراب ہوچکے ہیں، راستے پانی میں تبدیل ہوچکے ہیں، کورونا وباء کے وجہ سے لوگوں کے پاس کام نہیں ہے، اور راحت کے نام پر حکومت عوام سے چھلاوہ کررہی ہے۔
انہوں نے کہا کہ لوگوں کو یومیہ کام مکمل طور سے بند ہوچکا ہے، مویشیوں کے چارے پر بحران کے بادل منڈلا رہے ہیں، لوگوں کے پاس راشن نہیں، اور انتظامیہ سست پڑی ہوئی ہے۔
انہوں نے کہا کہ متاثرہ گاؤں میں انتظامیہ و ریاستی حکومت کا کوئی بھی عملہ نہیں پہنچا ہے، مقامی افراد سینے تک بھرے پانی میں آنے جانے کو مجبور ہیں، اور کئی جگہ ندی ہونے کی وجہ سے کشتیوں کا سہارا لینا پڑرہا ہے۔
ریاستی کانگریس صدر نے کہا کہ بی جے پی حکومت کو اپنی ناکامیاں چھپانے اور دوسرے پر الزامات لگانا بند کرکے متاثرین کی مدد کے لیے آگے آنا چاہیے۔
حکومت کو یہ سمجھنا چاہیے کہ 'اڑن کھٹولے' کے سروے سے لوگوں کو راحت نہیں ملتی، اس لیے حکومت کو فوراً راحت کا انتظام کرنا چاہیے۔
