اترپردیش کے ضلع ہردوئی میں افسروں نے کورونا گائیڈ لائن پر عمل نہ کرنے والوں کے خلاف ایکشن لیا، لیکن یہ کاروائی یک طرفہ ہی دیکھنے کو ملی۔ اس کاروائی کو دیکھ کر تو یہی کہا جاسکتا ہے کہ اس سے مساوات کے حقوق پامال ہوئے ہیں۔
پہلی تصویر گورنمنٹ انٹر کالج کی ہے۔ جہاں پر پہلے مرحلے کے لیے ہونے والے پنچایتی انتخابات میں افسروں کو ٹریننگ دی جا رہی ہے، ان تصاویر میں آپ دیکھ سکتے ہیں کہ کورونا وبا کی گائیڈ لائن پر یہ حکومتی ملازمین کتنا عمل کر رہے ہیں۔ یہ ایک دوسرے کے قریب تو بیٹھے ہی ہیں بہت کم ہی ملازمین نے ماسک لگایا ہے لیکن اس طرف نہ تو کسی کی نظر جاتی ہے اور نہ ہی ان ملازمین پر کوئی ایکشن ہوتا ہے۔
شہر کی دوسری تصویر دیکھئے، سنیما چوراہے پر ڈسٹرکٹ ایڈمنسٹریشن کا قافلہ وہاں سے گزرنے والے مزدور، آٹو ڈرائیورز، راہگیر اور طلباء کے خلاف چالان صرف اس بات پر کاٹے جا رہے ہیں کہ ان کے چہروں سے ماسک غائب ہیں، ملک سے وبا کو ختم کرنا ہے تو اس طرح کے ایکشن لینا لازمی ہے لیکن کیا یہ ایکشن صرف غریب اور مظلوم کے لیے ہی ہے، یہ ضرور ایک بڑا سوال ہے۔
