ریاست اترپردیش کے ضلع بنارس کی سڑکوں اور گلیوں میں بارش کا پانی جمع ہوگیا ہے جس کی وجہ سے علاقے کے لوگ آمد و رفت کے لیے کشتیوں کا استعمال کررہے ہیں۔
یہاں گنگا ندی خطرے کے نشان سے اوپر بہہ رہی ہے اور گھاٹ کے کنارے واقع مندرو مکانات پانی میں ڈوب چکے ہیں۔
ان گلیوں میں جب بھی سیلاب کا پانی بھرتا ہے تب علاقے کا سیویج سسٹم کام کرنا بند کر دیتا ہے جس کی وجہ سے گندگی گلیوں میں بہتی رہتی ہے۔
اور گندگی کے سبب راہگیروں کو سخت دشواریوں کا سامنا ہوتا ہے اور متعدد بیماریاں بھی بڑے پیمانے پر لوگوں کو اپنی چپیٹ میں لے لیتی ہیں۔
ان حالات میں جو مکانات زیادہ نشیب میں ہوتے ہیں وہاں کے لوگ اپنے مکانات چھوڑ کر اپنے رشتہ دار یا قرب و جوار میں کے اونچے مکانوں میں پناہ لینے پر مجبور ہیں۔
شہر الہ آباد کی بھی یہی صورت حال ہے جہاں ندیاں خطرے کے نشان سے اوپر بہہ رہی ہیں، پانی مسلسل بڑھتا جارہا ہے اور ندی کے کنارے آباد لوگ اپنے گھر کی چھتوں پر پناہ لیے ہوئے ہیں۔
واضح رہے کہ ریاست میں شدید بارش ہونے کے سبب گنگا، جمنا، بیتوا جیسی ندیوں میں طغیانی آئی ہوئی ہے متعدد ضلعوں میں پانی داخل ہوتا جارہا ہے۔ اس بارش کے سبب نشیبی علاقوں میں رہنے والے لوگوں کے گھر ڈوب چکے ہیں۔
ذرائع کے مطابق گنگا ندی میں پانی مزید بڑھنے کا امکان ہے۔
