ریاست اتر پردیش کے ضلع سنبھل سے سماجوادی پارٹی کے رکن پارلیمان شفیق الرحمٰن برق پر طالبان کی حمایت میں بیان دینے پر وطن سے غداری کا کیس درج کیا گیا ہے۔ بتادیں کہ سنبھل سے سماج وادی پارٹی کے رکن پارلیمان شفیق الرحمٰن برق نے طالبان کے افغانستان پر قبضے کے بارے میں ایک حیران کن بیان دیا تھا۔
اس معاملے میں بدھ کو سنبھل پولیس نے رکن پارلیمان شفیق الرحمٰن برق کے خلاف کیس درج کیا ہے۔ اب یہ معاملہ طول پکڑتا جارہا ہے۔ اس پر سیاسی تبصرے بھی آنا شروع ہوگئے ہیں۔
اتر پردیش بی جے پی نے اپنے ٹوئٹر ہینڈل سے ٹویٹ کیا اور کہا کہ 'یوگی حکومت طالبان کے حامیوں پر بہت سخت ہے۔'
یہ بھی پڑھیں: افغانستان کے معاملے پر بائیڈن اور جانسن جی-7 میٹنگ بلانے پر متفق
شفیق الرحمٰن برق نے طالبان کے افغانستان پر قبضے کی حمایت کی۔ طالبان کی حمایت میں بیان دیتے ہوئے برق نے افغانستان میں طالبان کی سرگرمیوں کو آزادی کی جنگ قرار دیا۔ برق نے کہا کہ 'طالبان افغان عوام کی آزادی کے لیے لڑرہے ہیں۔ افغانستان کی آزادی اس کا اپنا مسئلہ ہے۔ افغانستان میں امریکی حکومت کیوں؟ طالبان وہاں کی طاقت ہے اور افغان عوام اس کی قیادت میں آزادی چاہتے ہیں۔'
