ریاست اترپردیش کے بستی ضلع ہسپتال میں کام کرنے والی خاتون ہیلتھ ورکر کو گھر میں داخل نہ ہونے دینے پر مکان مالک کو مہنگا پڑ گیا۔ ایس پی ہیمراج مینا نے کوتوالی میں مالک مکان کے خلاف مقدمہ درج کرایا ہے۔ کورونا وائرس کی وجہ سے لاک ڈاؤن کے تحت کام کرنے والے افسران اور ملازمین کو مکمل تحفظ فراہم کرتے ہوئے ڈسٹرکٹ مجسٹریٹ نے یقین دہانی کرائی ہے کہ انہیں کسی قسم کی تکلیف نہیں ہونے دی جائے گی۔
بستی کے ضلع ہسپتال میں کوارینٹین وارڈ اور ضروری انتظامات کو دیکھنے پہنچے ضلع مجسٹریٹ اور ایس پی کو وارڈ لیڈی مانوی نے روتے ہوئے ساری دستان بتا دی کہ مکان مالک اسے اپنے گھر میں داخل ہونے کی اجازت نہیں دے رہا ہے۔ اس کی وجہ سے اس کو رہنے میں کافی پریشانی ہو رہی ہے۔
ضلع مجسٹریٹ نے ایسے تمام مکان مالکوں کو خبردار کیا ہے کہ وہ کورونا وائرس سے لڑنے والے عہدیداروں کے ساتھ مکمل تعاون کریں اور اس بات کو یقینی بنائیں کہ انہیں کسی قسم کی تکلیف کا سامنا نہ کرنا پڑے۔
پولیس سپرنٹنڈنٹ نے فوری طور پر ایف آئی آر درج کرکے مکان مالک کے خلاف کارروائی کرنے کی ہدایت دی ہے اور وارڈ لیڈی کو یقین دہانی کرائی گئی ہے کہ اسے کسی بھی قسم کی پریشانی نہیں ہونے دی جائے گی۔
ڈسٹرکٹ مجسٹریٹ آشوتوش نرنجن نے رہائشیوں سے اپیل کی ہے کہ وہ کورونا وائرس مریضوں کی دیکھ بھال کر رہے افسران کو مکمل مدد فراہم کریں۔ اس بحران کی گھڑی میں اپنی خدمات انجام دینے والے لوگوں کے خلاف اخلاقی ذمہ داری پر غور کرتے ہوئے ایک باہمی تعاون کا انداز اپنائیں۔
ضلعی مجسٹریٹ نے ڈسٹرکٹ ہسپتال کے سی ایم ایس کو ہدایت کی ہے کہ وہ اپنے تمام کوارنٹین وارڈوں کو صاف ستھرا رکھیں۔ جو لوگ حسنین کے جنازے میں گئے تھے ان افراد کو نشان زد کیا جائے گا اور انہیں 14 دن قرنطینہ میں رکھا جائے گا۔ ان کے لیے ڈاکٹروں اور عملہ کی ڈیوٹی 24 گھنٹوں کے لیے لگائی جائے گی۔ حفاظتی معیار کے مطابق ڈیوٹی میں مصروف تمام عملے کو ماسک، سینیٹائزر، صابن، دستانے بھی مہیا کیے جائیں گے۔
