ریاست اترپردیش کے شہر مرادآباد پہنچے اے آئی ایم آئی ایم کے صدر اسدالدین اویسی نے ای ٹی وی بھارت سے بات چیت کرتے ہوئے کہا کہ 'اتر پردیش میں مرادآباد کے بعد میرٹھ، علیگڑھ، جونپور سمیت کئی شہروں میں ہمارے جلسے منعقد ہونے والے ہیں۔'
اسدالدین اویسی نے کاس گنج معاملے پر کہا کہ 'الطاف کی موت کی وجہ پولیس ہے۔ پولیس کی کسٹڈی میں الطاف کی موت ہوئی ہے اور پولیس کہہ رہی ہے کہ الطاف نے بیت الخلاء میں پانی کی ٹنکی کے پائپ سے خودکشی کی ہے۔ اس معاملے میں پولیس اہلکاروں کو سسپینڈ نہیں بلکہ گرفتار کیا جانا چاہیئے۔'
اتر پریش کے ریاستی انتخابات میں آل انڈیا مجلس اتحاد المسلمین کس پارٹی سے اتحاد کرے گی اس سوال کا جواب دیتے ہوئے کہا کہ 'یہ وقت بتائے گا ہم اترپردیش میں الیکشن لڑیں گے۔ ہمارے ریاستی صدر شوکت علی نے کہا ہے کہ 'ہم سو سیٹوں پر تیاری کررہے ہیں۔'
اویسی نے تریپورہ معاملے پر کہا کہ 'تریپورہ میں بھارتیہ جنتا پارٹی کی حکومت ہے۔ بی جے پی کی ناکامی کی وجہ سے تشدد و فساد کرنے والے لوگوں نے مسجدوں پر حملہ کیا۔ تریپورہ حکومت کو تشدد پسند لوگوں پر سخت کارروائی کرنی چاہیے۔'
یہ بھی پڑھیں: بھارت کی تقسیم کے ذمہ دار جناح ہیں، ملک کے مسلمان نہیں: اسد اویسی
آپ یوپی میں سیاسی جلسے کررہے ہیں اور تریپورہ میں تشدّد ہورہا ہے آپ نے ابھی تک تریپورہ کا دورہ کیوں نہیں کیا؟
اس سوال کا جواب دیتے ہوئے اسد الدین اویسی نے کہا 'آپ ان سے معلوم کیجئے جو وہاں نہیں جارہے۔ ہم نے ہمیشہ پارلیمنٹ میں ظلم و تشدّد کے خلاف آواز اٹھائی ہے۔'
