دیڑھ سال سے زیادہ وقت سے رام نگر وائلڈ لائف کنزرویشن کی نگرانی میں قتل کی سزا کاٹ رہے ہاتھی مٹھو کی جلد رہائی ہوسکتی ہے۔ مٹھو کے درد کو کسی شخص نے ٹویٹر کے ذریعے وارانسی کے پولیس کپتان اے ستیش گنیش تک پہنچایا۔ جس کے بعد انہوں نے چڑیا گھر کے ڈائریکٹر رمیش پانڈے سے بات کر مٹھو کو جلد سے جلد پیرول پر رہا کرنے کی بات کہی ہے۔
معلوم ہوکہ قریب دیڑھ سال قبل وائلڈ لائف کنزرویشن کے تحت اس ہاتھی کو بیڑیوں میں باندھ کر وارانسی ضلع کے رام نگر وائلڈ لائف علاقے میں رکھا گیا تھا۔
یہ ہے پورا معاملہ
معاملہ چندولی ضلع کا ہے۔ یہاں ڈیڑھ سال قبل 20 اکتوبر 2019 کو ایک ہاتھی نے راما شنکر نام کے ایک شخص کی جان لے لی تھی۔ رام شنکر کے گھر والوں نے ہاتھی اور ہاتھی کے مہنت کے خلاف ببوری تھانے میں قتل کا مقدمہ درج کرایا تھا۔ ہاتھی اور مہنت دونوں کو گرفتار کرکے جیل بھیج دیا گیا، جبکہ ہاتھی کو وارانسی میں واقع وائلڈ لائف کے سپرد کر دیا گیا اور اس وقت سے وہ بیڑیوں میں جکڑا ہے۔ ہاتھی کے چاروں پیروں میں لوہے کی موٹی زنجیریں باندھی گئی ہیں۔
مہنت ہوا رہا، ہاتھی قید میں
حادثے کے بعد مہنت کو کچھ دنوں کے بعد ضمانت مل گئی، لیکن ہاتھی ابھی بھی قید میں ہے، ضمانت کے لئے عرضی ضرور ڈالی گئی لیکن سنوائی شروع ہونے سے پہلے لاک ڈاؤن لگ گیا اور ضمانت کی عرضی آگے بڑھ گئی۔ فی الحال گزشتہ دیڑھ سال سے ہر روز 1000 روپیے کا خرچ برداشت کرتے ہوئے ہاتھی کی دیکھ بھال کی جارہی ہے۔ اب امید جگی ہے کہ پولیس کمشنر اے ستیش گنیش اس سمت میں پہل کرتے ہوئے بے زبان کے درد کو سمجھیں گے اور اس کی رہائی کا راستہ تلاشیں گے۔ مانا جارہا ہے کہ جلد ہی ہاتھی مٹھو کو وارانسی سے دوھوا نیشنل پارک بھیجا جا سکتا ہے۔
