ریاست اتر پردیش کے سہارنپور میں دارالعلوم وقف کے مہتمم مولانا محمد سفیان قاسمی نے آج ایک اپیل جاری کرتے ہوئے کہا کہ ایک گذشتہ ایک سال سے کورونا وائرس نے پوری دنیا کو اپنی لپیٹ میں لے رکھا ہے۔
انہوں نے کہا کہ اس مہلک وبا کے نتائج کا اس وقت انسانیت کو سامنا ہے، جہاں اصحاب ایمان اس عالمی وبا کو اللہ تعالیٰ کی جانب سے آزمائش کے تناظر میں دیکھ رہے ہیں، وہیں تدبیر اور تدارک کے پیش نظر سے اسلام کے حفظان صحت کے حوالہ سے اختیار کی جانے والی احتیاطی تدابیر سے معاشرہ میں پائی جانے والی غفلت اور لا پرواہی کے بارہ میں بھی فکر مند ہیں۔
انہوں نے کہا کہ حفظان صحت، پاکیزگی اور نظافت اسلام کے بنیادی موضوعات کا اس قدر اہم ترین حصہ ہے کہ نبی کریم ﷺ نے طہارت اور پاکیزگی کو نہ صرف ایمان سے تعبیر فرمایا ہے بلکہ نماز سے پہلے پاکیزگی کی غرض سے وضوء کا فرض کیا جانا اس کی دلیل ہے۔
انہون نے کہا کہ انفرادی سطح سے لیکر اجتماعیت تک صحت مندی کے تمام راز انہیں اصولوں کی پاسداری سے مربوط ہیں۔
مولانا سفیان قاسمی نے کہا کہ اس وبا کے زیر اثر محکمہ صحت کی ابتدائی ہدایت میں سوشل ڈسٹینسنگ، ماسک اور سینیٹائزر کے استعمال کو صحت کی حفاظت کے پیش نظر ضروری قرار دیا گیا ہے۔ جس کے انتظامیہ نے یقینا بڑی حد تک تحفظ فراہم کیا ہے۔
انہوں نے کہا کہ اب اسی سلسلہ میں ایک عظیم کوشش کے بعد موجودہ وبا سے حفاظت کے پیش نظر ایک ویکسین تیار کر لی گئی ہے اور اس ویکسین کو عوام تک پہنچانا بھی آسان کر دیا گیا ہے۔ انتظامیہ متاثرین کو اس ویکسین کی فراہمی کے لئے کوشاں ہیں ، جو یقینا قابل تحسین عمل ہے۔
مولانا سفیان قاسمی نے کہا کہ افواہوں سے بچتے ہوئے ڈاکٹروں اور تجربہ کار سائنس دانوں کی رپورٹ، ہدایات اور ان کی اپیل کی روشنی میں مذکورہ ویکسین پر بھروسہ کیا جانا چاہئے۔
