پی ایل پنیا نے الزام عائد کیا کہ بھارتیہ جنتا پارٹی کے دور حکومت میں دلت محفوظ نہیں ہے۔
انہوں نے کہا کہ بی جے پی امبیڈکر کا نام تو لیتی ہے لیکن ان کا احترام نہیں کرتی۔
ریاست اتر پردیش کے ضلع بارہ بنکی میں ای ٹی وی بھارت سے خصوصی گفتگو کے دوران پی ایل پنیا نے کہا کہ اتر پردیش میں وقتاً فوقتاً دلتوں کو بے عزت کرنے اور امبیڈکر کے مجسمے کو توڑنے کا کام کیا جاتا رہا ہے۔
انہوں نے کہا کہ اس معاملے میں سہارنپور سب سے زیادہ بدنام ہے اور وہاں پیش آنے والا واقعہ یہ ظاہر کرتا ہے کہ بی جے پی سے وابست افراد دلتوں کے تعلق سے کس طرح کی ذہنیت رکھتے ہیں۔
پنیا نے کہا کہ بی جے پی حکومت میں دلت محفوظ نہیں ہے اور بی جے پی و آر ایس ایس رہنماؤں کی ذہنیت منووادی ہے جس کی وجہ سے دلتوں پر مظالم ڈھائے جاتے ہیں۔
انہوں نے کہا کہ ایک جانب بھارتیہ جنتا پارٹی ڈاکٹر امبیڈکر کا نام لے کر ملک کے آئین کی بات کرتی ہے تو دوسری جانب ان کے ماننے والوں کا استحصال کیا جاتا ہے جو قابل مذمت ہے۔
