بھارت سمیت پوری دنیا میں کورونا وائرس کے مریضوں کی تعداد بڑھتی جا رہی ہے اور اس کا حوف روز بروز بڑھتا ہی جا رہا ہے۔ کورونا وائرس کے بڑھتے اثرات کو دیکھتے ہوئے تعلیمی ادارے بند کیے جا رہے ہیں، لیکن ریاست اترپردیش کے ضلع مرادآباد میں واقع مدرسوں پر اس کا کوئی اثر دیکھنے کو نہیں مل رہا ہے۔
کورونا وائرس کے بڑھتے معاملات کے باوجود یہاں پر کوئی تعطیل کا اعلان نہیں کیا گیا ہے جبکہ ریاستی حکومت نے کورونا وائرس کے پیش نظر سبھی تعلیمی اداروں کو 22 مارچ تک بند کرنے کا اعلان کیا ہے۔
کورونا وائرس کے خوف سے مدرسوں میں ماسک لگا کر بچوں کو درس دیا جارہا ہے۔ ساتھ ہی بچوں کو کورونا وائرس کے انفیکشن سے بچانے کے لیے ضروری اقدامات کیے جا رہے ہیں۔
کورونا وائرس کے پیش نظر بھارت میں ہائی الرٹ جاری کیا گیا ہے لیکن مدرسوں کے طالب علم مسلسل تعلیم حاصل کرنے کے لیے آرہے ہیں لیکن احتیاط کے طور پر ماسک لگا کر آرہے ہیں۔
مدرسہ کے صدر محمد تحسین بتاتے ہیں کہ مدرسہ میں تقریبا 50 بچے دینی تعلیم حاصل کرتے ہیں۔ پہلے بچوں کو آمنے سامنے دو قطار میں بٹھایا جاتا تھا۔ حالانکہ آمنے سامنے بچوں کے درمیان فاصلہ رہتا تھا۔ لیکن اب بچوں کو الگ الگ بٹھایا جا رہا ہے۔ بچوں کے بیچ میں 2 سے 3 میٹر کا فاصلہ رکھا گیا ہے اور بچوں کو گھر سے ہی ماسک لگا کر آنے کو کہا گیا ہے۔ کورونا وائرس کے بڑھتے اثرات کو دیکھتے ہوئے مدرسہ میں صاف صفائی کا خاص خیال رکھا جارہا ہے۔
