یوپی کے بجٹ میں خواتین کو بااختیار بنانے کا دعوی کھوکھلا: کانگریس

اترپردیش حکومت نے مالی سال 2021-22 کے لئے 5 لاکھ 50 ہزار کروڑ روپے کا بجٹ پیش کیا ہے۔ بجٹ میں یوگی حکومت نے خواتین کو بااختیار بنانے کے لیے متعدد اسکیموں کا اعلان کیا ہے۔ اس پر کانگریس کی رہنما رفعت فاطمہ نے کہا ہے کہ 'یہ بجٹ صرف دکھاوے کے لیے ہے۔ اس میں خواتین کی تعلیم اور ان کے تحفظ کے لیے کوئی پختہ اعلان نہیں کیا گیا ہے۔'

یوگی حکومت نے 22 فروری کو اپنا پانچواں و آخری بجٹ پیش کیا ہے۔ مالی سال 2021-22 کے لئے 5 لاکھ 50 ہزار کروڑ روپے کا بجٹ پیش کرتے ہوئے یوگی حکومت نے خواتین کو بااختیار بنانے کے لیے متعدد اسکیموں کا اعلان کیا ہے۔

ای ٹی وی بھارت سے بات کرتے ہوئے کانگریس کی رہنما رفعت فاطمہ نے کہا کہ 'بجٹ میں ترقی کے نام پر عوام کو دھوکہ دیا گیا ہے۔ سرکار خواتین کو بااختیار بنانے کا دعوی کر رہی ہے، لیکن زمینی حقائق اس کے برعکس ہیں۔ ایک طرف جہاں خواتین کو بااختیار بنانے کا دعوی ہو رہا ہے وہیں، دوسری جانب رسوئی گیس کی قیمت میں مسلسل اضافہ کیا جارہا ہے۔ اس سے سبھی کے گھروں کا بجٹ بگڑتا جا رہا ہے۔'

رفعت فاطمہ نے کہا کہ 'بجٹ میں خواتین کی تعلیم اور ان تحفظ کے لیے کوئی خاص اعلان نہیں کیا گیا۔ جبکہ سرکار 'مشن شکتی' کے نام پر صرف پیسا بہانے کا کام کر رہی ہے۔ وہ صرف اخبارات میں اشتہار دے رہی ہے اور چوراہوں پر ہورڈنگس و بینر لگوا رہی ہے، سرکار کے سارے دعوے کھوکھلے ہیں۔'

وہیں، شریا چودھری نے بھی یوگی حکومت کی جانب سے پیش کردہ بجٹ پر تنقید کرتے ہوئے کہا کہ 'بجٹ کے ذریعہ یوگی حکومت عوام کو دھوکہ دے رہی ہے۔ کانگریس کی سابق صدر سونیا گاندھی نے کہا تھا کہ ہر شعبہ میں خواتین کی حصہ داری ہونی چاہئے۔ ایسا کرنے پر ہی ہمارا سماج اور ملک ترقی کر سکتا ہے۔'

انہوں نے کہا کہ 'آج بھلے ہی بجٹ میں بڑے بڑے اعلانات کر کے خواتین کو بااختیار بنانے کا دعوی کیا جا رہا ہو لیکن موجودہ حکومت خواتین کے لئے ایسا کوئی پختہ کام نہیں کر رہی ہے، جس سے ان کے خلاف ظلم و زیادتی کو روکا جا سکے۔ اس کے برعکس اتر پردیش میں خواتین کے ساتھ زیادتی کے معاملات بڑھتے جا رہے ہیں۔'

قابل ذکر ہے کہ بجٹ پیش کرتے ہوئے ریاستی وزیر خزانہ سریش کھنہ نے کہا تھا کہ 'کنیا سمنگلا اسکیم' اور 'مشن شکتی' کے تحت مستقل کام ہو رہا ہے اور خواتین کی حفاظت کے لیے مسلسل اسکیمیں چلائی جا رہی ہیں۔ اس کے علاوہ خواتین کو روزگار فراہم کرنے کے لیے بھی کوششیں جاری ہیں۔'