سلطان پور: کانگریس کے رہنما راہل گاندھی کو ایم پی ایم ایل اے کورٹ نے پانچ سال پہلے بی جے پی کے رہنما ومرکزی وزیر داخلہ امت شاہ کے خلاف نازیبا ریمارکس پر 16 دسمبر کو سماعت کے لیے طلب کیا ہے۔
درخواست گزار کے وکیل سنتوش پانڈے کے مطابق یہ معاملہ راہل گاندھی کی جانب سے پانچ سال قبل بنگلورو میں دی گئی تقریر سے متعلق ہے۔ راہل گاندھی پر اس تقریر میں امت شاہ پر نازیبا تبصرہ کرنے کا الزام ہے۔ اس ویڈیو کے سامنے آنے کے بعد بی جے پی رہنما وجے مشرا نے ایم پی ایم ایل اے کورٹ میں راہل گاندھی کے خلاف شکایت درج کرائی تھی۔ اسی معاملے میں ایم پی-ایم ایل اے کورٹ کے جج یوگیش یادو نے 18 نومبر کو سماعت کی۔
کیس کی سماعت مکمل ہونے کے بعد عدالت نے فیصلہ محفوظ کر لیا تھا۔ اس معاملے میں عدالت نے 27 نومبر کی تاریخ مقرر کی تھی۔ اب عدالت نے اس معاملے میں کانگریس کے رہنما راہل گاندھی کو 16 دسمبر کو طلب کیا ہے۔ انہوں نے بتایا کہ یہ معاملہ 2018 کا ہے۔
مزید پڑھیں: ای ڈی نے راہل گاندھی سے پانچویں روز، رات دیر گئے تک پوچھ تاچھ کی
بی جے پی کے رہنما اور کوآپریٹو بینک کے سابق چیئرمین وجے مشرا نے راہل گاندھی کے خلاف 4 اگست 2018 کو ہتک عزت کا مقدمہ دائر کیا تھا، اس پورے معاملے کی سماعت مکمل ہونے میں پانچ سال کا عرصہ لگا۔ بتایا گیا کہ عدالت نے اس معاملے میں راہل گاندھی کو دفعہ 500 کے تحت طلب کیا ہے۔ اب عدالت نے اس معاملے میں راہل گاندھی کو سمن جاری کرتے ہوئے 16 دسمبر کو طلب کیا ہے۔
