مولانا کلب صادق کے انتقال کے بعد ملک و بیرون ملک سے تعزیتی پیامات کا سلسلہ شروع ہوگیا جو ابھی تک جاری ہے۔ وہیں ریاست اترپردیش کے ضلع سنبھل میں ایک تعزیتی مجلس منعقد کی گئی۔
سرسی سادات کی مسجد محلہ شرقی سادات میں منعقدہ تعزیتی مجلس میں بھارت کے مشہور و معروف شاعر اہل بیت رضا سرسوی اور مسجد کے امام مولانا میثم عباس، مولانا اصغر کے علاوہ دیگر علما نے شرکت کی۔ مجلس میں عوام کی خاصی تعداد بھی موجود تھی۔
اس موقع پر شاعر رضا سرسوی نے کہا کہ ڈاکٹر کلب صادق نے ہمیشہ ہندومسلم اور شیعہ سنی اتحاد پر زور دیا جبکہ ان کی تعلیمی خدمات کو بھی کبھی فراموش نہیں کیا جاسکتا۔
میثم عباس نے کہا مولانا کلب صادق کے انتقال سے صرف شیعہ قوم کا نہیں بلکہ بھارت کا نقصان ہوا ہے جس کی بھرپائی ناممکن ہے۔ مولانا کلب صادق کے انتقال کے بعد سے تعزیتی اجلاس کا سلسلہ جاری ہے اور ان کی یاد میں سمینارز منعقد کئے جارہے ہیں۔
