اترپردیش مدرسہ منتظمین کے علاوہ بورڈ کے ذمہ داران اور طلبا کا ماننا ہے کہ اس سال امتحانات کا انعقاد ایک بڑا چیلنج ہے۔ یو پی مدرسہ تعلیمی بورڈ کے احکامات پر عمل کرتے ہوئے بورڈ سے ملحق مدارس میں امتحان فارم کے رجسٹریشن کا سلسلہ تو شروع ہو چکا ہے لیکن اب تک فارم داخل کرنے والے طلبا کی تعداد گذشتہ برس کے مقابل اس سال کافی کم ہے۔
مدرسین اور منتظمین کا کہنا ہے کہ مدارس کے طلباء اس سال امتحانات میں شامل ہونے کے لیے ذہنی اور تعلیمی اعتبار سے مکمّل طور پر تیار نہیں ہیں، ایسے میں سالانہ امتحانات کا عمل محض رسم کی ادائیگی ہی ہوگا۔
وہیں مدرسہ بورڈ کے ذمہ داران کا بھی ماننا ہے کہ اس سال امتحانات منعقد کرنا بورڈ کے لیے ایک بڑا چیلنج ہے جبکہ ابھی تک یہ طے نہیں ہوپایا کہ امتحان آن لائن ہوں گے یا آف لائن ہوں گے۔ اس کے علاوہ امتحانی مراکز کے تعلق سے بھی کوئی فیصلہ نہیں کیا جاسکا۔
ماہرین کے مطابق باضابطہ طور پر نصاب تکمیل کے بغیر طالب علموں پر امتحانات کا بوجھ آئندہ سال کے تعلیمی نظام کو بھی متاثر کرسکتا ہے جو طلبا کےلیے ٹھیک نہیں ہے۔
