اتر پردیش کے گریٹر نوئیڈا میں پولیس کے انکاؤنٹر کا سلسلہ جاری ہے۔ بقول پولیس دیر رات نوئیڈا سیکٹر 58 تھانہ کے تحت بگ ڈی پارک رام لیلا گراؤنڈ کے قریب پولیس اور گائے اسمگلر کے تصادم میں دو ملزمان کو زخمی ہونے کے بعد گرفتار کر لیا گیا ہے۔
جن میں دہلی کے پہلوان چوک بٹلہ ہاؤس کے گلزار قریشی ولد یونس قریشی اور گاؤں اجراڈا پولیس تھانہ مڈالی ضلع میرٹھ اتر پردیش کے رضوان قریشی ولد مومین قریشی شامل ہیں۔
دونوں ملزمان بلند شہر سے 25-25 ہزار اور علی گڑھ ضلع سے 25-25 ہزارروپے کے انعامی ملزم ہیں۔
ملزم کے قبضے سے سوئفٹ ڈیزائیر کار اور ایک پستول 315 بور، 01 زندہ کارتوس 315 بور اور 01 پستول 32 بور، 02 زندہ کارتوس برآمد ہوئے ہیں۔
پولیس کے مطابق گشت کے دوران ایک کار نوئیڈا سیکٹر62 کی جانب سے آتی ہوئی دکھائی دی پولیس نے روکنے کی کوشش کی لیکن انہوں نے گاڑی کی رفتار بڑھا دی۔
جس سے سوئفٹ کار بے قابو ہو کر ڈیوائڈر سے ٹکرا گئی جس کے بعد یہ گاڑی سے اتر کر بھاگنے لگے۔ جب پولیس نے گھیرا تنگ کیا تو انہوں نے پولیس پر فائرنگ کر دی۔
جس کے بعد جوابی فائرنگ میں دونوں زخمی ہوئے۔ پولیس کا کہنا ہے کہ ان کے خلاف غازی آباد، میرٹھ، ہاپوڑ اور بلند شہر میں درجنوں مقدمات درج ہیں۔
