بریلی میں درگاہ اعلیٰ حضرت امام احمد رضا خاں فاضل بریلوی سے وابستہ تنظیم ”جماعت رضائے مصطفیٰ“ کا سالانہ جشن، خاندانِ اعلیٰ حضرت کی عظیم الشان شخصیت تاج الشریعہ کی درگاہ پر بڑی شان و شوکت کے ساتھ منایا گیا۔ اس جشن میں منعقدہ تقریب میں مسلم معاشرے کی بہتری، مذہبی اور کاروباری اطوار مضبوط بنانے کے منصوبے پر زور دیا گیا۔
حال ہی میں اعلیٰ حضرت امام احمد رضا خاں فاضلے بریلوی کا 103 واں ”عرس رضوی“ گزشتہ ماہ اکتوبر میں منایا گیا تھا۔ جماعت رضائے مصطفیٰ، درگاہ اعلیٰ حضرت سے وابستہ سب سے قدیمی تنظیم ہے۔
قابل ذکر ہے کہ اعلیٰ حضرت امام احمد رضا خان فاضلے بریلوی نے اپنے دورِ حیات میں ایک درجن سے زائد زبانوں میں 72 موضوعات پر تقریباً 1400 سے زائد کتابیں لکھیں تھیں۔
دعائیہ تقریر میں قاضی القضاۃ مفتی حضرت عسجد رضا خاں نے سلسلہ ئے عالیہ قادریہ رضویہ سے وابستہ افراد سے آپس میں اتفاق، اتحاد، اخلاص سے رہنے کی ہدایت کی۔
اُنہوں نے مزید کہا کہ آپس میں محبت اور مروت قائم کرکے ایک دوسرے کے لیئے مدد کا جزبہ پیدا کریں۔ کسی دیگر سیاسی جماعتوں پر منحصر ہونے کے بجائے خود مختار ہونے کی کوشش کریں۔ بچوں کو دینی اور دنیاوی علم سکھانے کے لیئے ضرور کوشاں رہیں۔
