اتر پردیش کے ضلع جونپور کے تھانہ کھیتا سرائے حلقہ میں واقع رشی تالاب سے آج ایک 11 سالہ لڑکی کی لاش ملنے سے علاقے میں سنسنی پھیل گئی، لڑکی کی شناخت چوہٹہ محلہ رہائشی ٹلٹھو نائی عرف تلک دھاری شرما کی بیٹی اجالا کے طور پر ہوئی ہے۔
اطلاعات کے مطابق گزشتہ 18 اگست کو اجالا اچانک اپنے گھر سے غائب ہوگئی، کافی تلاش کے بعد بھی جب کوئی خبر نہ ملی تو لڑکی کے والد نے تھانہ کھیتا سرائے میں گمشدگی کی رپورٹ درج کروائی۔
معاملہ درج ہوتے ہی تھانہ کھیتا سرائے کے انچارج راجیش کمار یادو اور قصبہ انچارج ہری شنکر یادو نے فوری طور پر لڑکی کی برآمدگی کے لیے مہم شروع کردی لیکن لڑکی کا کچھ سراغ نہ مل سکا، جس کے بعد پولیس نے لڑکی کے اہل خانہ سے بھی پوچھ تاچھ کی مگر کچھ خاص جانکاری حاصل نہیں ہوسکی۔ جب کہ پڑوسی اس معاملے کو گھریلو ہراسانی بتارہے تھے۔
مزید پڑھیں:نوئیڈا: دو معصوم بچوں کے قاتل باپ کی لاش برآمد
وہیں 21 اگست کو کھیتاسرائے قصبہ کے کھٹہن روڈ پر واقع رشی تالاب میں گمشدہ لڑکی کی لاش پانی کے اوپر تیرتی ہوئی نظر آئی، اس دوران موقع پر لوگوں کا ہجوم اکٹھا ہوگیا۔ اطلاع ملتے ہی شاہ گنج سی او انکت کمار کے حکم پر تھانہ کھیتا سرائے انچارج راجیش کمار یادو اپنی ٹیم کے ساتھ موقع پر پہونچے اور لاش کو تالاب سے باہر نکلوایا، جس کے بعد لڑکی کی شناخت ٹلٹھو نائی عرف تلک دھاری شرما کی بیٹی اجالا کے طور پر ہوئی۔
کھیتاسرائے تھانہ انچارج راجیش کمار یادو نے بتایا کہ لاش کو پوسٹ مارٹم کے لیے بھیج دیا گیا ہے رپورٹ آنے کے بعد کارروائی کی جائے گی۔
