'بی جے پی ووٹ کے لیے اپنے کارکن کو بھی قتل کرا سکتی ہے'

کانگریس رہنما اور یوپی حکومت کے سابق وزیر آر کے چودھری نے کملیش تیواری کے قتل کے لیے بی جے پی حکومت کو ذمہ دار بتایا ہے۔ چودھری نے اس معاملے کی تحقیقات سی بی آئی سے کرانے کا مطالبہ بھی کیا ہے۔

ریاست اترپردیش کے ضلع بارہ بنکی می‍ں ای ٹی وی بھارت سے بات کرتے ہوئے لکھنؤ کی سروجنی نگر سیٹ سے کئی دفعہ رکن اسمبلی رہ چکے آر کے چودھری نے کہا کہ جس طرح سے کملیش تیواری کے اہل خانہ وزیراعلیٰ یوگی آدتیہ ناتھ پر الزام لگا رہے ہیں اس سے واضح ہے کہ بی جے پی نے ہی کملیش تیواری کا قتل کرایا ہے۔

لکھنؤ کی موہن لال گنج پارلیمانی سیٹ سے اس دفعہ کانگریس کے ٹکٹ پر انتخاب لڑ چکے آر کے چودھری نے اس قتل کی تحقیقات سی بی آئی سے کرانے کا مطالبہ کیا ہے۔
آر کے چودھری نے مزید کہا کہ بی جے پی حکومت یہاں کے مسلمانوں کو خوف میں رکھنا چاہتی ہے۔ ٹی وی پر ہندو مسلمان اور پاکستان پر بلا وجہ کی بحث کرا کر دو طبقوں کے درمیان بی جے پی تفریق ڈالنا چاہتی ہے۔
قابل ذکر ہے کہ جمعہ کی دوپہر کو لکھنؤ میں ہندو سماج پارٹی کے رہنما کملیش تیواری کا قتل کر دیا گیا تھا۔ جس کے بعد سے قسم قسم کے انکشافات ہو رہے ہیں۔
چودھری نے کملیش تیواری قتل کے معاملے میں ہوئے انکشاف پر سوالات کھڑے کئے ہیں۔