بارہ بنکی: بی جے پی رہنما نے ایس پی کا دامن تھام لیا

سرولی غوث پور بلاک سے سربراہ بھارتیہ جنتا پارٹی کی امیدوار سپنا چوہان نے اپنی پرچہ نامزدگی واپس لی اور ساتھ ہی وہ سماجوادی پارٹی میں بھی شامل ہو گئیں۔

ریاست اتر پردیش میں بلاک سربراہ انتخابات ہو رہے ہیں۔ضلع بارہ بنکی میں بی جے پی کی امیدوار سپنا چوہان نے اپنا پرچہ واپس لیا اور سماج وادی پارٹی میں شمولیت اختیار کی۔

واضح رہے کہ سرولی غوث پور آنجہانی بینی پرساد ورما کا آبائی گاؤں ہے۔ یہاں سے ان کی بہو رینو ورما سماجوادی پارٹی کی امیدوار ہیں۔ یہاں کامیابی حاصل کرنا آنجہانی بینی پرساد ورما کے لئے عزت کا سوال تھا۔

اسلئے سابق ریاستی وزیر اروند سنگھ گوپ نے حکمت عملی بنانا شروع کی جس کے نتیجہ میں بی جے پی امیدوار سپنا چوہان نے نہ صرف پرچہ نامزدگی واپس لی بلکہ وہ ایس پی میں شامل بھی ہو گئیں۔

سابق ریاستی وزیر نے اس کامیابی کو آنجہانی بینی پرساد ورما کو خراج عقیدت کے طور پر پیش کیا ہے۔ انہوں نے دعویٰ کیا کہ بلاک سربراہ کے انتخابات میں بھی سماجوادی پارٹی کے امیدواروں کو کامیابی حاصل ہوگی۔