لکھنؤ: سماج وادی پارٹی(ایس پی) صدر اکھلیش یادو نے کہا ہے کہ بی جے پی کی ڈبل انجن حکومت کی سب سے بڑی حصولیابی مہنگائی ہے۔ اس کا گراف ہر سال اونچا ہی ہوتا جا رہا ہے۔Akhilesh Yadav On Inflation
اکھلیش نے بدھ کو کہا کہ بی جے پی کی غلط پالیسیوں کی وجہ سے بی جے پی کے سرمایہ دار دوست تو مالا مال ہوتے جارہے ہیں جبکہ عوام قلاش ہوتے جارہے ہیں۔ بی جے پی سماج کے ہر طبقے کا استحصال کرنے سے ہی نہیں روکی اس نے طے کر لیا ہے کہ اب وہ بچوں کو بھی نہیں چھوڑے گی۔
انہوں نے کہا کہ بی جے پی اقتدار میں ڈیزل،پٹرول، سی این جی، رسوئی گیس وغیرہ کی دام آسمان چھو رہے ہیں۔ آٹا، دال،چاول، سبزی ،تیل، دودھ،دہی پر بھی جی ایس ٹی لگا دی گئی ہے جس سے لوگوں کا جینا مشکل ہوگیا ہے۔ چاول میں 10سے لے کر 20روپئے، ارہر دال میں 15روپئے، زیرہ میں 25 روپے اور لال مرچ میں 40روپے تک اضافہ ہوگیا ہے۔ پراگ، امول، مدرڈیری سمیت سبھی دودھ کمپنیوں نے دودھ کی قیمتوں میں اضافہ کردیا ہے۔
ایس پی صدر نے کہا کہ بی جے پی کی خراب طرز حکمرانی میں مہنگائی، بدعنوانی خوف پھل پھول رہی ہے۔ عوام الناس کی کہیں سنوائی نہیں۔ ہر طرف لوٹ مچی ہوئی ہے۔ لوگوں میں مایوسی کے ساتھ اشتعال بھی پنپ رہاہے۔ عوام اب بی جے پی کا مکمل ٹکٹ کاٹنے کا من بنا چکی ہے۔
یوان آئی
