بریلی میں واقع زینب کانونٹ اسکول کے مالک اور ڈائریکٹر ڈاکٹر قدیر احمد نے اعلان کیا ہے کہ اپنے تمام طلبہ کی ماہ مارچ سے لیکر ستمبر تک یعنی چھ مہینے کی کل فیس معاف کردی ہے۔
ڈاکٹر قدیر احمد نے کہا ہے کہ کورونا وائرس کے اس پرآشوب دور میں لوگوں کے سامنے معیشت کا بحران ہے، لوگوں کے ہاتھوں سے کام ختم ہو رہا ہے۔ جن کے ہاتھوں میں کام بچا ہے ان کا کوئی پرسان حال نہیں ہے۔ گزشتہ چھ مہینے میں حکومت کے لاک ڈاؤن کے نفاذ نے کاروبار کی کمر توڑکر رکھ دی ہے، بازاروں کو کھولنے کی ہدایات میں بھی تذبذب کے حالات نے کاروبار کو تباہ کر دیا ہے۔
ڈاکٹر قدیر احمد نے مزید کہا کہ اب تک اسکول کھولنے کے امکانات نظر نہیں آرہے ہیں۔ دوسرا پہلو یہ ہے کہ مڈل کلاس فیملی کے پاس دو وقت کی روٹی کا انتظام کرنا مشکل ہو رہا ہے تو اسکول فیس کا انتظام کرنا حال فی الحال ممکن نہیں ہے۔
انہوں نے کہا کہ فیس جمع نہ کر پانے کی صورت میں والدین اپنے بچوں کو اسکول بھیجنے سے بھی گریز کر رہے ہیں۔ لہذا والدین کی مشکل کو آسان کرنے کے لیے یہ راستہ نکالا گیا ہے کہ اسکول میں تعلیم حاصل کرنے والے تمام طلبہ کی فیس معاف کر دی جائے۔ اب حکومت سے اجازت ملنے کے بعد والدین بغیر کسی تفریق کے اپنے بچوں کو اسکول بھیج سکتے ہیں۔
